QR Code

عمران خان کا 21 اکتوبر کو پیپلزپارٹی کے گڑھ لاڑکانہ میں جلسہ عام کا اعلان

2 Oct 2014 18:02

اسلام ٹائمز: میانوالی روانگی سے قبل سے میڈیا سے گفتگو میں کپتان نے کہا کہ دھرنوں ہی کی وجہ سے انقلاب گھر گھر پہنچا اور آج ’’گو نواز گو‘‘ کا نعرہ بچے بچے کی زبان پر آگیا ہے یہ گالی نہیں، جمہوری معاشرے میں نعرہ لگانا ہر ایک کا بنیادی حق ہے۔

اسلام ٹائمز۔ پاکستان تحریک انصاف کے چیئرمین عمران خان نے کہا ہے کہ ’’گو نواز گو‘‘ گالی نہیں جمہوریت کے عین مطابق ہے اور ہم نعرے لگانے پر لوگوں کو تشدد کا نشانہ بنانے والے بادشاہوں کے خلاف لڑ رہے ہیں۔ میانوالی میں جلسہ عام میں شرکت کے لئے روانگی سے قبل میڈیا سے بات کرتے ہوئے عمران خان نے کہا کہ ہم قوم کو ان کے حقوق کے لئے جگا رہے ہیں اور دھرنے نے اس سلسلے میں بہت اہم کام کیا ہے، یہی وجہ سے ہے کہ ملک میں وی آئی پی کلچر کا خاتمہ ہو رہا ہے۔ دھرنوں ہی کی وجہ سے انقلاب گھر گھر پہنچا اور آج ’’گو نواز گو‘‘ کا نعرہ بچے بچے کی زبان پر آگیا ہے یہ گالی نہیں، جمہوری معاشرے میں نعرہ لگانا ہر ایک کا بنیادی حق ہے لیکن گذشتہ روز وزیر آباد میں نعرہ لگانے والے کو مسلم لیگ (ن) کے رکن صوبائی اسمبلی نے تشدد کا نشانہ بنایا جو کہ غیر جمہوری تھا۔ مریم نواز اور شہباز شریف نے گذشتہ روز جس طرح کی بات کی، وہ ان کی سمجھ سے بالاتر ہے اور اسی کو بادشاہت کہتے ہیں جس کے خلاف ہم لڑ رہے ہیں۔ عمران خان نے کہا کہ میانوالی ان کا آبائی حلقہ ہے اور اسی شہر سے وہ پہلی مرتبہ قومی اسمبلی کے رکن منتخب ہوئے، اس لئے انہوں نے کراچی اور لاہور میں جلسہ عام کے بعد میانوالی جانے کا فیصلہ کیا۔ انہوں نے کہا کہ تحریک انصاف 21 اکتوبر کو لاڑکانہ میں جلسہ کرے گی۔

خبر کا کوڈ: 412916