QR Code

عمران خان کو اپنی آنکھ کا شہتیر نظر نہیں آتا

جے ڈی ڈبلیو کمپنی کا طیارہ تحریک انصاف کی ملکیت بن چکا ہے، پرویز رشید

23 Nov 2014 18:41

اسلام ٹائمز: اسلام آباد میں پریس کانفرنس کرتے ہوئے وزیر اطلاعات کا کہنا تھا کہ آرڈیننس کے مطابق طیارہ سیاسی مقاصد کیلئے استعمال نہیں کر سکتے، جے ڈی ڈبلیو نے طیارہ کاروباری مقاصد کیلئے خریدا، سیاست کیلئے نہیں۔

اسلام ٹائمز۔ وزیر اطلاعات پرویز رشید کا کہنا ہے کہ جے ڈی ڈبلیو کمپنی کا طیارہ تحریک انصاف کی ملکیت بن چکا ہے، طیارے کے اخراجات کا کہیں کوئی ذکر نہیں، کہتے ہیں غلط بیانی پر کمپنی کو جرمانہ اور ڈائریکٹر کو دوسال قید کی سزا ہو سکتی ہے۔ اسلام آباد میں پریس کانفرنس کرتے ہوئے وزیر اطلاعات نے کہا کہ جے ڈی ڈبلیو ایک پرائیویٹ لمیٹڈ کمپنی ہے، جس میں جہانگیر ترین کے 29.7 فیصد حصص ہیں، آرڈیننس کے مطابق طیارہ سیاسی مقاصد کیلئے استعمال نہیں کر سکتے، جے ڈی ڈبلیو نے طیارہ کاروباری مقاصد کیلئے خریدا، سیاست کیلئے نہیں۔ پرویز رشید کا کہنا تھا کہ جے ڈی ڈبلیو کے جہاز پر دوہزار بارہ میں ہونے والے اخراجات کا کہیں اندراج نہیں، اسی طرح دو ہزار تیرہ میں جہاز پر چار کروڑ بیانوے لاکھ روپے خرچہ آیا لیکن اس رقم کا بھی کہیں کوئی ذکر نہیں۔ انہوں نے کہا کہ کوئی بھی پبلک لمیٹڈ کمپنی کسی سیاسی جماعت کو چندہ نہیں دے سکتی، حیرت ہے کہ ہماری سائیکل پر خرچہ آتا ہے اور عمران کے جہاز پر کوئی خرچہ نہیں آتا۔ عمران خان دوسروں پر تنقید کرتے ہیں لیکن انہیں اپنی آنکھ کا شہتیر نظر نہیں آتا۔ وزیر اطلاعات پرویز رشید نے عمران خان کے زیراستعمال طیارے کی ویڈیو بھی میڈیا کو دکھائی۔

خبر کا کوڈ: 421048