اسلام ٹائمز۔ روسی وزیر خارجہ سرگئی لاوروف نے جرمنی کے وزیر خارجہ ہایکوماس کے ساتھ مشترکہ پریس کانفرنس میں کہا ہے کہ امریکہ کی ایران کے خلاف لگائی جانے والی نئی پابندیاں خطے کی صورتحال کو مخدوش کردیں گی اور روس امریکہ تعلقات پر منفی اثر ڈالیں گی۔ ان کا کہنا تھا کہ واشنگٹن کی تہران کے خلاف لگائی جانے والی یک طرفہ پابندیوں کے سلسلے میں کچھ نہیں کیا جا سکتا۔ ایران کے جوہری معاہدے کو ختم کرنے کا امریکی فیصلہ اقوام متحدہ کی سلامتی کونسل کی قرارداد کے مخالف ہے۔ روسی وزیر خارجہ نے اسرائیل اور ایران کے درمیان موجودہ جنگی صورتحال پر اپنے تحفظات کا اعلان کیا۔ پریس کانفرنس سے خطاب کرتے ہوئے جرمنی کے وزیر خارجہ نے کہا کہ جرمنی ایران کے ساتھ ہونے والے جوہری معاہدہ میں باقی رہنا چاہتا ہے۔