عوامی نیشنل پارٹی کسی بھی جماعت سے اتحاد نہیں کریگی، امیر حیدر ہوتی

اسلام ٹائمز۔ عوامی نیشنل پارٹی خیبر پختونخوا کے صدر و سابق وزیراعلٰی امیر حیدر خان ہوتی نے کہا ہے کہ قبائلی علاقوں اور خصوصاً باجوڑ میں انتخابی مہم چلانے میں کسی قسم کی مشکلات نہیں ہیں، تاہم اور بھی بہتر ہوتا اگر قبائلی علاقوں کو صوبہ میں ضم کرنے کے بعد وہاں صوبائی اسمبلی کے انتخابات بھی ہو جاتے تو اسمبلی میں انہیں بروقت نمائندگی مل جاتی، لیکن وقت کی کمی کے باعث ایسا نہ ہو سکا۔ مردان میں اپنی رہائشگاہ پر ایک شمولیتی تقریب کے بعد میڈیا سے بات چیت کرتے ہوئے امیر حیدر خان ہوتی کا کہنا تھا کہ اگلی حکومت کی ذمہ داری بنتی ہے کہ وہ قبائلی علاقوں میں قانون کی عملداری کو یقینی بنائے۔ انہوں نے کہا کہ آئندہ عام انتخابات میں عوامی نیشنل پارٹی کسی بھی جماعت سے اتحاد نہیں کرے گی۔ 2013ء کے عام انتخابات میں عوامی نیشنل پارٹی دہشت گردوں کے نشانے پر تھی جس کے باعث وہ جلسے جلوس نہ کر سکے، تاہم اس مرتبہ حالات سازگار ہیں جس کی وجہ سے عام انتخابات میں عوامی نیشنل پارٹی کا نتیجہ بھی کافی بہتر ہوگا۔ اس موقع پر عوامی نیشنل پارٹی کے صوبائی صدر نے الیکشن کمیشن کو بھی شدید تنقید کا نشانہ بنایا اور کہا کہ الیکشن کمیشن صرف ایک سیاسی جماعت کو نہیں بلکہ سب کو ایک نظر سے دیکھے اور قانون پر عمل درآمد یقینی بنائے۔