جوہری ایندھن بنانے کیلئے UF6 کارخانے نے کام شروع کر دیا، ایران اٹامک انرجی آرگنائزیشن
اسلام ٹائمز۔ ایران کی اٹامک انرجی آرگنائزیشن نے اعلان کیا ہے کہ UF6 کی پروڈکشن کیلئے اصفہان میں جوہری ایندھن بنانے والے ایک اہم کارخانے نے اپنا کام شروع کرد دیا ہے۔ یہ کارخانہ ایران کی جوہری صنعت میں خاص اہمیت کا حامل ہے۔ ایران کی تاریخ میں تقریبا 9 سال کے عرصے کے بعد پہلی مرتبہ اس کارخانے میں یلو کیک یعنی یورینیمآکسائیڈ ڈالا گیا ہے۔
UF6 پروڈکشن فیکٹری اصفہان کے UCF کمپلیکس میں واقع ہے جو گذشتہ 9 سالوں سے یلو کیک کی کمی کی وجہ سے بند پڑا تھا۔ ایران کے عالمی طاقتوں کے ساتھ ہونے والے جوہری معاہدے کے بعد ملک کے اندر تیار کیا گیا اور باہر سے درآمد شدہ یلو کیک اب اس کارخانے کو چلانے کیلئے ضروری مقدار میں فراہم ہو چکا ہے۔ امریکہ کے ایرانی جوہری معاہدے سے جدا ہونے کے بعد حال ہی میں رہبر انقلاب اسلامی آیت اللہ خامنہ ای نے ملک کی ایٹمی آرگنائزیشن کو حکم دیا تھا کہ جوہری سرگرمیاں دوبارہ شروع کی جائیں۔ البتہ یہ سرگرمیاں فی الحال عالمی طاقتوں کے ساتھ ہونے والے جوہری معاہدے کی حدود کے اندر ہی انجام پائیں گی۔