دہشتگرد نظریات کے حامل افراد کو انتخابات میں حصہ لینے کی اجازت نقصان دہ ہے، رضا ربانی

ان کا کہنا تھا کہ نیشنل ایکشن پلان میں نیکٹا بننے کی بات کی گئی اور نیکٹا کی جانب سے 15 جون کو الیکشن کمیشن کو بریف کیا جاتا ہے کہ سکیورٹی خدشات ہیں، جس کے بعد سیکرٹری الیکشن کمیشن کے بیان کے بعد صوبوں کو ایک خط لکھ دیا گیا۔ انہوں نے حکومت کے عمل پر شدید تنقید کرتے ہوئے کہا کہ سیاسی کارکنوں کی گرفتاری کے حکم پر عمل درآمد نظر آرہا ہے، اسپیکر قومی اسمبلی کے اوپر دہشت گردی کا مقدمہ درج کرنے میں تیزی ہے، لیکن مستونگ واقعے پر خاموشی ہے۔ انہوں نے کہا کہ ہم کس نہج پر جا رہے ہیں، وزیر داخلہ پھر کہیں گے کہ جن پر حملے ہوئے ان کے نام اس فہرست میں شامل نہیں تھے، جن پر حملے کا خدشہ تھا، بدقسمتی سے کئی برسوں سے واقعات ہوتے رہے ہیں اور مذمتی قراردادیں پاس ہونے کے بعد ہم بھول جاتے ہیں۔ رہنما پی پی پی کا کہنا تھا کہ مستونگ واقعے کی جتنی مذمت کی جائے وہ ناکافی ہے، پورا ایوان بلوچستان کے محنت کش عوام کے ساتھ مشکل گھڑی میں ساتھ کھڑا ہے۔ انتخابات کے حوالے سے بات کرتے ہوئے انہوں نے کہا کہ پہلے بھی آئی جے آئی اور ایم ایم اے بنائی گئی اور اس بار ایک نئے نام سامنے آیا ہے اور کالعدم تنظیموں کو مین اسٹریم میں لایا جا رہا ہے۔

انہوں نے کہا کہ وزیر داخلہ بتائیں کہ کالعدم تنظیموں کو انتخاب لڑنے کی اجازت کیسے دی گئی، فیض آباد پر دھرنا دینے والی جماعت کے 150 قومی اسمبلی کے لئے امیدوار ہیں، اسی طرح اللہ اکبر جماعت کے بھی امیدوار انتخابات میں حصہ لے رہے ہیں۔ کالعدم تنظیموں کو انتخابات میں حصہ لینے کی اجازت پر تشویش کا اظہار کرتے ہوئے انہوں نے کہا کہ ان میں سے 25 لوگ بھی اسمبلی آگئے تو اسمبلی کا کیا ماحول ہوگا، لیکن ریاست آج بھی اسی طرز پر چل رہی ہے۔ انہوں نے کہا کہ ریاست اپنی سوچ میں جب تک بنیادی تبدیلی نہیں لاتی، اس وقت تک راہیں ایسی ہی رہیں گی، لیکن انجنیئرڈ الیکشن وفاق کے لئے خطرے کی گھنٹی ہوں گے۔ رضا ربانی نے کہا کہ پیپلز پارٹی کی قیادت کو قدم، قدم پر روکا جاتا ہے، ہم نے امیدواروں پر پارٹی چھوڑنے کے لیے دبأو ڈالنے والوں کے نام بھی دیئے ہیں، شکارپور اور سکھر سے بھی پیغامات آرہے ہیں، لیکن الیکشن کمیشن سویا ہوا ہے کیونکہ وہاں الیکشن کمیشن کے پر جلتے ہیں۔ انہوں نے کہا کہ ہم نے مطالبہ کیا ہے کہ جو نام دیئے گئے ہیں، وزیر دفاع اس کا جواب دیں، صاف و شفاف انتخابات کے علاوہ دیگر راستے تباہ کن ہوں گے۔

پاکستان مسلم لیگ نون کے سینیٹر پرویز رشید نے بھی اسی طرح کے جذبات کا اظہا کرتے ہوئے کہا کہ فورتھ جوڈیشل میں شامل افراد کو انتخاب لڑنے کی اجازت دینے سے ملک میں پرامن مہم چلانے کی توقع نہ رکھی جائے بلکہ اس دن سے خوف زدہ ہوں، جس دن وہ لوگ اس ایوان میں موجود ہوں گے۔ ان کا کہنا تھا کہ 10 ہزار پولیس والے صرف اس ڈیوٹی پر مامور تھے کہ ایک شخص کو کیسے گرفتار کرنا ہے حالانکہ وہ شخص جو خود اپنی بیٹی کے ساتھ گرفتاری دینے آیا تھا، لیکن پشاور اور مستونگ واقعے کہ ذمہ دار دندناتے پھر رہے ہیں۔ پرویز رشید کا کہنا تھا کہ 16 ہزار سیاسی کارکنوں کو گرفتار کیا گیا، جن میں سے 99 فیصد کارکنان کا تعلق مسلم لیگ نون ہے۔ انہوں نے سوال اٹھاتے ہوئے کہا کہ ریاست کی کی ترجیحات کیا ہیں؟، ریاست نے یہ طے کر لیا ہے کس کو کچلنا ہے اور کس کو طاقت ور کرنا ہے، لیکن ان ترجیحات کو تبدیل کرنے کی ضرورت ہے۔ لیگی سینیٹر نے کہا کہ ہمارے دشمنوں کو خودکش جیکٹ پہننے والا شخص کہاں سے میسر ہو رہا ہے اور اس نظریئے کی پرورش کس نے کی ہے، ان لوگوں کو ایوانوں میں لانے کی پالیسی کیا نواز شریف یا بینظیر نے بنائی تھی۔ انہوں نے کہا کہ اس ایوان کو بتایا جاتا کہ پالیسی کس نے بنائی، بہت ہوگیا، بہت لہو بہہ گیا، خدا کے لئے اپنے انداز فکر کو بدلو، ریاست اپنی بنیادی ذمہ داری پوری کرنے میں ناکام رہی ہے حالانکہ سوشل کنٹریکٹ پر شہری نے مکمل عملدرآمد کیا ہے، 4 مرتبہ ملک میں مارشل لا نافذ کیا گیا اور ریاست نے شہریوں کے ساتھ کیا سلوک کیا۔

سکیورٹی خدشات کا اظہار کرتے ہوئے انہوں نے کہا کہ کوئی شہری گھر میں بیٹھ کر بھی محفوظ ہونے کا دعویٰ نہیں کرسکتا، شاید ریاست کی ترجیحات کچھ اور ہیں، عوام کے مفادات کہیں اور ہیں۔ سینیٹر کلثوم پروین نے کہا کہ مستونگ واقعے کی بعض چینلز نے رات 11 بجے تک کوئی کوریج نہیں کی۔ سینیٹر اشوک کمار نے وفاقی وزیر داخلہ پر کڑی تنقید کی اور کہا کہ وزیر داخلہ کو کبھی کسی صوبے میں جاتے ہوئے نہیں دیکھا انھیں چاروں صوبوں کے وزرا داخلہ کا بھی پتہ نہیں ہوگا اور انھوں نے کبھی کسی صوبے کے چیف سیکرٹری سے ملاقات بھی نہیں کی، ایسا وزیر داخلہ ہماری کیا حفاظت کرے گا۔ سینیٹر کبیر شاہی کا کہنا تھا کہ مستونگ واقعہ تاریخ کا سب سے بڑا واقعہ ہے، جس میں جاں بحق 213 افراد کو دفنایا جا چکا ہے جبکہ 158 زخمی ہیں۔ میڈیا کے کردار پر تنقید کرتے ہوئے ان کا کہنا تھا کہ میڈیا فروخت ہوچکا ہے، پارٹیوں میں بک چکا ہے۔ انھوں نے کہا کہ 213 افراد کی شناخت ہوچکی ہے اور بعض لاشوں کی شناخت بھی نہیں ہوئی، اطلاع دی گئی ہے کہ چار خودکش حملہ آور خضدار اور قلات میں داخل ہوچکے ہیں، اگر خودکش حملہ آور کے داخل ہونے کا علم ہے تو انھین پکڑا کیوں نہیں جاتا۔