0
Saturday 30 August 2014 - 14:56

İHMK-i ruhani Tale Bağırovla bağlı müraciət yaydı

Story Code : 407545
İHMK-i ruhani Tale Bağırovla bağlı müraciət yaydı
Müraciəti olduğu kimi təqdim edirik:

Azərbaycan Respublikasının İnsan hüquqları üzrə müvəkkili Elmira Süleymanovaya;

Ədliyyə naziri Fikrət Məmmədova;

Ədliyyə nazirinin müavini, Penitensiar xidmətin rəisi
Mədət Quliyevə, İslamçıların Hüquqlarını Müdafiə Komitəsinin
Müraciəti

Məlum olduğu kimi, ilahiyyatçı, Avropa Şurası tərəfindən vicdan məhbusu kimi tanınan Tale Bağırov bir neçə gün əvvəl həbsxanadan ictimaiyyətə müraciət edib. Müraciətində Tale Bağırov saxlanıldığı 12 saylı Cəzaçəkmə Müəssisəsində həbsxana rəhbərliyi tərəfindən təzyiqlərə məruz qaldığını bildirib. T.Bağırov bildirib ki, həbsxana rəhbərliyi siyasi məhbuslarla düşmən əsiri kimi davranılır: “Qanunla icazə verilsə də, yaxınlarımla görüşümə icazə verilmir, hətta bəzən evdən gətirilən sovqatı belə güc-bəla ilə qəbul edirlər. Ancaq Kürdəxanı təcridxanasında olduğum zaman yaxınlarımla görüşməyimdə, sovqatın çatdırılmasında heç bir maneə yox idi. Onda belə çıxır ki, Azər Seyidov öz karyerasını riskə ataraq yuxarıların tapşırığına məhəl qoymurdu, yaxud da ki, Rauf Məmmədov hakimiyyətə yarınmaq üçün dəridən-qabıqdan çıxır?! İstənilən halda, mən, şərlənərək həbs olunan birisi kimi və haradan qaynaqlandığından asılı olmayaraq bütün bu qanunsuzluqların, özbaşınalıqların dərhal dayandırılmasını tələb edirəm”.

Eyni zamanda bu müraciət yayıldıqdan sonra məlum olub ki, 12 saylı həbsxananın rəisi vicdan məhbusuna deyib ki, məhbusla görüşə kimi buraxıb-buraxmayacağına özü qərar verir. Belə ki T.Bağırov həbs olunduğu ilk günlərdə onun yanına gələnlərdən biri görüş siyahısına yazılıb və hazırda həbsxana rəhbərliyi yalnız bu adamı görüşə buraxacağını bildirib. Halbuki bu, qanunsuzdur. Məhbusun yaxınlarının onunla görüşmək hüququ var.

Üstəlik həbsxana rəhbərliyinin T.Bağırovun müraciətindən narazı qaldığı, ona qarşı yeni təxribatlar hazırladığı haqda məlumatlar yayılır. Bütün bunlar Müdafiə Komitəsini narahat edir. Heç bir sübut olmadan narkotik saxlama maddəsi ilə iki il həbs cəzası almış ilahiyyatçının həbsinin və məhkum olduğu vaxt təzyiqlərlə üzləşməsi ilə bağlı danılmaz faktlar var. Saxlanılarkən ağır işgəncəyə məruz qalmış T.Bağırov-u beynəlxalq təşkilatların nümayəndələri və Ombudsman Aparatının əməkdaşları ziyarət edib və ona qarşı işgəncə faktlarını sənədləşdirib. İndi isə həbsxana rəhbərliyi Azərbaycan qanunları və ölkəmizin qoşulduğu beynəlxalq konvensiyalarda əksini tapmış məhbusun toxunulmaz hüquqlarını tapdayaraq Tale Bağırova təzyiq edir.

Bütün bunlar dözülməz haldır və Müdafiə Komitəsi Elmira Xanım Süleymanovadan Tale Bağırovu nəzarətinə götürməyi, onun məhbus haqlarını müdafiə etməsini xahiş edir. Eyni zamanda Ədliyyə Naziri Fikrət Məmmədovun və Penitensiar Xidmətin rəisi Mədət Quliyevin 12 saylı cəzaçəkmə müəssisəsində baş verənləri nəzarətə götürməsini, məhkumun təməl haqlarını pozan həbsxana rəisi barədə hüquqi ölçü götürməsini tələb edir.

İslamçıların Hüquqlarını Müdafiə Komitəsi

islamazeri.az
Source : Islamazeri
Comment