اسلام ٹائمز۔ مجلس وحدت مسلمین پنجاب کے سیکرٹری جنرل علامہ عبدالخالق اسدی سینکڑوں کارکنان کے قافلے کے ہمراہ کل اتوار کو صبح بھکر جلسہ کے لئے روانہ ہونگے۔ مجلس وحدت مسلمین ضلع جھنگ، گڑھ موڑ، گڑھ مہاراجہ، حیدر آباد تھل، منکیرہ میں کارکنان استقبال کریں گے اور قافلوں کی شکل میں بھکر جلسہ گاہ پہنچیں گے۔ لاہور میں علامہ عبدالخالق اسدی نے بھکر جلسہ عام کے حوالے سے کارکنوں سے خطاب کرتے ہوئے کہا کہ بھکر کا جلسہ یہاں کی تاریخ کا سب سے بڑا عوامی جلسہ ثابت ہو گا، یہاں کے عوام نے جاگیرداروں اور اسٹیٹس کو کے خلاف جس جواں مردی سے مزاحمت کی ہے، اس کی تاریخ میں کوئی مثال نہیں ملتی، انشاءاللہ مجلس وحدت مسلمین عوامی حقوق اور قومی وحدت کے لئے جدوجہد جاری رکھے گی اور انشاءاللہ وطن عزیز سے نفرت کا خاتمہ کر کے تکفیریت کو شکست دینگے۔