AİP lideri hacı Mövsüm Səmədovun yazısını İslamazeri.az-a onun ailəsi verib: “Bismihi Təala. Hər bir xalq öz övladlarının səyi nəticəsində öz səadətini təmin edir. Bir xalqın nə qədər çox iradəli, pak, elm və mənəviyyata rəğbətli, igid və şücaətli övladları olarsa, digər xalqlar içində hörmət və ehtiramı bir o qədər yüksələr. Xalqımız da tarix boyu belə şəxsiyyətlərlə zəngin olub və zaman keçdikcə bu istedadını itirməmişdir. Bu gün öz istiqlaliyyətini ələ gətirmiş xalqımız məhz belə oğulların himmətinə göz dikmişdir. Belə oğullardan biri də Hacı Abgül Süleymanovdur. Gənc çağlarından din və mənəviyyata öz vücudu ilə bağlanmış Hacı Abgül Süleymanov xalqımızın qarşısında olan bütün problemlərinin həllini Qurani Kərimin göstərişlərində və məsumların (ə) həyat tərzində görmüşdür. O, elm təhsilində yüksək əzmə malik olmaqla bərabər, ruhunun tərbiyə və təzkiyəsində də ciddiyyəti əldən verməmişdir. Bunun kənarında xalqımızın gənc nəsli ilə müxtəlif dini heyət və QHT-lərdə iştirak edərək onları əxlaqsızlıq və fəsaddan qoruyaraq, onların qəflət yuxusuna düçar olmamağı üçün əlindən gələni əsirgəməyib. Hacı Abgül Süleymanovun təbliğatında əsas hədəf ədalətsizlik və haqsızlıqla mübarizə durur. Bunun nəticəsidir ki, hal-hazırda o, azadlıqda deyil, zindandadır. Bu gün Hacı Abgül Süleymanovun timsalında Azərbaycan gəncliyi öz gerçək nümünəsini tapmışdır desək yanılmamışıq!”
