Rusiyadan Azərbaycana təhdid gündəmdə qalmaqdadır

Ukraynanın cənub şərq bölgəsində son zamanlar baş verən gərginlik fonunda MDB ölkələri o cümlədən lokal münaqişələrə cəlb olunan ölkələrin ictimaiyyətində Rusiya və qərb arasındakı diplomatik qarşıdurma geniş müzakirə olunmaqdadır. Azərbaycan da bu məsələdə istisna deyil. Bir neçə həftədir, Ukrayna hadisələri fonunda rus politoloqlarının milli mətbuatda müsahibələri, bəyanatları ard arda dərc olunmaqdadır. Əsas sual ondan ibarətdir ki, Rusiya və ABŞ arasındakı münasibətlərin gərginləşməsi, Krım hadisələrinin baş verdiyi zaman Ermənistan Azərbaycan Dağlıq Qarabağ münaqişəsi necə inkişaf edə bilər?

Əksər halda rus ekspertləri belə hesab edir ki, indiki şəraitdə Azərbaycan Qarabağın hərb yolu ilə azad olunmasına cəhd etdikdə ölkəmiz böyük problemlərlə qarşılaşa bilər. Rusiya Ermənistana açıq dəstək verməklə Azərbaycanı daha böyük fəlakətlərə məruz qoya bilər. Yəni sadə dildə desək, ruslar Azərbaycanı Qarabağda hərbi əməliyyatlara başlayacağı təqdirdə təhdid edir. İlham Əliyev də Rusiyaya yaxşı bələd olan adam kimi ehtiyatlı davranır, lakin imkan düşdükcə də müxtəlif beynəlxalq tədbirlərdə və çıxışlarında hakimiyyətinin müstəqilliyini bəyan edir. Hələlik rəsmi Moskva da Əliyev hakimiyyətinə qarşı açıq tələbli siyasətə keçməyib, bunun bir səbəbi İlham Əliyevin özünü ehtiyatlı aparmasıdırsa, digər səbəbi də Kremlin prioritetlər sırasına Azərbaycanın daxil olmamasıdır. Lakin bəzi ekspertlər də var ki, onlar Əliyevin özünün necə aparmasından aslı olmayaraq, Azərbaycanın yaxın gələcəkdə Rusiyanın qəzəbinə tuş gələ biləcəyini ehtimal edir.