Anar Məlikovun işində yenilik var

İlahiyyatçı Tale Bağırovla birgə həbs olunan Anar Məlikovun maşınından çıxan silahın ekspertizası aparılacaq. Bunu vəkil Bəxtiyar Hacıyev deyib. O bildirib ki, silahın ekspertizası tələbi ilə DİN-in Baş Mütəşəkkil Cinayətkarlıqla Mübarizə İdarəsinin müstəntiqi qarşısında qaldırdığı vəsatət təmin olunub: “Yəqin ki, 10 gün ərzində silah ekspertizaya göndəriləcək”.

Anar Məlikov martın 31-də tutulub və aprelin 13-dək Baş Mütəşəkkil Cinayətkarlıqla Mübarizə İdarəsində saxlanıb. Hazırda o, Bakı İstintaq Təcridxanasındadır. Rəsmi məlumata görə, Anar Məlikovun üstündən “Makarov” tipli tapança, 4 patron və 1 bıçaq çıxıb.

Vəkil deyib ki, Anar Məlikovun işi ilə bağlı hal şahidi yoxdur: “Adətən belə şahidlər polislərin qohumlarından və ya polis idarəsinin qarşısındakı sürücülərdən olur. Amma bu dəfə nədənsə istintaq hal şahidi tapmağa çətinlik çəkir”.