Demokratik Qüvvələrin Milli Şurasının yaradıcılarından olan Müsavat başqanı Isa Qəmbər keçid dövrü üçün vahid namizəd olmaq niyyətində deyil. Bu barədə Isa Qəmbər özü “mediaforum”a açıqlamasında bildirib: “Mən prezidentliyə vahid namizəd olmağımla bağlı təklif verməmişəm. Demokratik Qüvvələrin Milli Şurası partiya üzvü olmayan ziyalılarımızdan birinin 2 illik keçid dövrü üçün vahid namizəd kimi irəli sürülməsi konsepsiyası əsasında yaranıb. Müsavat Partiyasının da bu meyarlara cavab verən prioritet namizədi Rüstəm Ibrahimbəyovdur. Hazırda bu məsələ müzakirə mərhələsindədir. Təsis bəyannaməsində 2 illik keçid dövrü hökumətilə bağlı kifayət qədər ciddi müddəalar var. Eyni zamanda bu, bir bəyannamədir. Indiki mərhələdə ciddi sənədə ehtiyac var, bu sənədin layihəsi hazırlanmalıdır. Iyunun 18-də Eldar Namazov və Əli Kərimli ilə işçi görüşümüzdə digər məsələlərlə yanaşı, bu istiqamətdə də fikir mübadiləsi olub".