İsrail Aşurada Həsən Nəsrullaha terror planlaşdırıbmış

İnterAz-ın “FarsNews”a istinadla verdiyi xəbərə görə, bu barədə Hollandiyada çap edilən “De Telegraaf” qəzeti məlumat yayıb.

Qəzet, İsraildə olan bəzi Avropa rəsmilərinə istinadla bildirib ki, bu plan Həsən Nəsrullahın Aşura günündə əzadarlıq mərasimi zamanı kütlə qarşısında çıxışı zamanı həyata keçiriləcəkmiş və burada pilotsuz təyyarələrin aviazərbələrindən istifadə etmək nəzərdə tutulubmuş.

Mənbənin iddiasına görə, “Hizbullah” liderini qoruyan əsgərlər, yaxın ərazilərə girən təyyarələrin gəlişini başlarında radar xasiyyətinə malik olan təchizatlanmış papaqlar vasitəsilə müəyyənləşdirə bilirlər. Onlar Beyrut yaxınlığında Cəbəl-Şeyx yüksəkliklərində yerləşdirilən Rusiya radarlarından təchizatlanmış papaqlarına ötürülən dalğalar vasitəsilə hər şeydən xəbərdar olurlar.

Qeyd edək ki, “Hizbullah” lideri adətən çıxışlarını video konfrans şəklində həyata keçirir. Son Aşura günündə onun cəmiyyət qarşısında çıxışı İsraili də təəccübə vadar etmişdi.

Xatırladaq ki, “Hizbullah”ın sabiq lideri Seyyid Abbas Musəvi də İsrailin terror hücumuna məruz qalıb. O və ailəsi, 1992-ci ildə İsrail ordusuna məxsus Apaçi təyyarəsinin endirdiyi aviazərbədə həlak olmuşdu.