Islam Times - Şəhidlər vətənə döndü

IslamTimes - Son zamanlar öldürülmüş iki azərbaycanlı hərbi qulluqçunun və Dağlıq Qarabağ ərazisində yerləşən Madagis kəndindən olan bir nəfər mülki şəxsin cəsədləri ötən gün Beynəlxalq Qızıl Xaç Komitəsinin (BQXK) himayədarlığı altında repatriasiya olunub.

BQXK-dan APA-ya verilən məlumata görə, əməliyyat Ağdam rayonunun təmas xətti yaxınlığında yerləşən Baş Qərvənd kəndi istiqamətində baş tutub.
“Cəsədlərin qaytarılması kədərli hadisə olsa da, vəfat etmiş şəxslərin ailələri öz əzizlərini dəfn edib onlara yas tuta biləcəklər”, - deyə BQXK-nın Bərdə ofisinin başçısı Elen Plenevo bildirib: “Biz Dağlıq Qarabağ münaqişəsi ilə əlaqədar repatriasiya prosesinin son vaxtlar intensivləşməsinə sevinirik”.
Bu həftənin əvvəlində neytral vasitəçi qismində çıxış edən BQXK, bütün aidiyyəti olan tərəflərin razılığına əsasən Ermənistanda saxlanılan bir nəfər mülki şəxsin və bu ilin oktyabr ayında Bakıda vəfat etmiş Ermənistan vətəndaşının cəsədini repatriasiya edib.
Cenevrə Konvensiyalarına əsasən fəaliyyət göstərən BQXK Azərbaycanda və Ermənistanda Dağlıq Qarabağ münaqişəsi ilə əlaqədar 1992-ci ildən etibarən işləyir.
Qeyd edək ki, meyiti qarşı tərəfə təhvil verilən şəxs Ermənistan vətəndaşı, 81 yaşlı Qavruşa Arustamyandır. Ermənilər isə Mübariz İbrahimov və Fərid Əhmədovun meyitlərini qaytarıblar.
Xatırladaq ki, gizir Mübariz İbrahimov bu il iyunun 18-də, zabit Fərid Əhmədov isə sentyabrın 4-də cəbhənin Tərtər istiqamətində düşmənin hücumunu dəf edərkən qəhrəmancasına şəhid olublar.