Islam Times - ABŞ: Braziliya və Argentina Fələstini tanımaqda tələsiblər

IslamTimes - Fələstinlilərin İsrail tərəfindən qətliam edilməsinə kənardan tamaşa edən ABŞ, digər dövlətlərin Fələstini himayə etməsinə qıcıqlanır

"Argentina və Braziliya Fələstin dövlətini 1967-ci il sərhədlərində tanımaqda tələsiblər." Çilidə səfərdə olan ABŞ dövlət katibinin siyasi işlər üzrə müavini Uilyam Börns belə bir fikirlə çıxış edib.
«Bizim fikrimizcə, bunun üçün hələ tezdir», deyə o jurnalistlərə bildirib.
«Yalnız fələstinlilər və israillilərin özləri danışıqlar yolu ilə Fələstin dövlətinin yaradılması və onun İsraillə dinc yanaşa yaşaması ideyasını həyata keçirə bilərlər», deyə o əlavə edib.
Ötən bazar ertəsi Buenos-Ayres Braziliyanın Fələstini 1967-ci il 4 iyun sərhədlərində tanımaq qərarına qoşulduğunu açıqlayıb. Uruqvay da 2011-ci ildə Fələstin dövlətini tanıyacağını bildirib.
1967-ci ildə Altıgünlük müharibə zamanı İsrail Sinay yarımadası, Qəzza zolağı, İordan çayının qərb sahili, Şərqi Qüds və Colan təpələrini ələ keçirib. /Milli.Az/