İran İslam İnqilabı Rəhbəri Ayətullah Xamenei bu gün axşam Cənubi Afrika Respublikası prezidenti Yakob Zuma ilə görüşdə iqtisadi və siyasi əməkdaşlıqların genişləndirilməsinə təkid edərək, deyib: Müstəqil ölkələr bir-birilərinə daha çox yaxınlaşmalı və əməkdaşlıqlarını bəzi hegemon qüdrətlərin pozuculuqlarına rəğmən genişləndirməlidirlər.
Ayətullah Xamenei İslam İnqilabından sonra Cənubi Afrika Respublikasının aparteid rejimi ilə əlaqələrin kəsilməsinə toxunaraq buyurub: İslam Respublikası təxminən eyni zamanda həm sionist rejim, həm də aparteid rejimi ilə əlaqələrini kəsdi.
İnqilab Rəhbəri iki ölkənin Qoşulmama Hərəkatındakı anlaşmasını əməkdaşlığın digər sahəsi adlandırıb və əlavə edib: Bu əməkdaşlıqlar Qoşulmama Hərəkatına üzv bütün ölkələrin xeyrinə olacaqdır.
İslam İnqilabı Rəhbəri buyurub: Müstəqil ölkələrin mənafeyi müxtəlif sahələrdə əməkdaşlığın artırılmasındadır və bəzi qüdrətlərin bu əməkdaşlıqlar qarşısında yaratdığı maneələrlə mübarizə aparmaq lazımdır.
Cənubi Afrika Prezidenti Yakob Zuma da bu görüşdə ölkəsinə və xalqına olan yardımları və dəstəklərinə görə İran İslam Respublikasına təşəkkür edib və deyib: Cənubi Afrika Respublikası xalqı heç vaxt İranın yardımlarını unutmayacaq. Nelson Mandellanın İrana səfəri də rəsmi Tehrana təşəkkür etmək məqsədi daşıyırdı.
Y. Zuma Qərbin İrana qarşı sanksiyaları ilə heç vaxt razılaşmadığını vurğulayıb və deyib: İki ölkə əlaqələrinin genişləndirilməsi üçün bir çox sahələr mövcuddur. Biz iqtisadi və ticarət sahələrində əməkdaşlıqların artırılmasına çalışmalıyıq.
CAR prezidenti İnqilab Rəhbəri və İran xalqının çox aydın düşüncə və mübariz ruha malik olmasını da alqışlayıb və deyib: İran İslam Respublikası dünyada hökm sürən zorakı atmosferdə özünə güvənərək bütün problemlərin öhdəsindən gəlməyin mümkün olduğunu bütün dünyaya sübut etdi.
