ÜÇ AYA ÜÇ QƏLƏBƏ

Son 3 ayda dünya insanlığın qeyri-insanlıq üzərində 3 qələbəsinə şahid oldu. Bu qələbə silsilənin ilki ötən ilin son ayında müsəlman İraqında qeydə alındı. Sadə bir insan, sıravi bir juranlist, o zamana qədər heç kimin tanımadığı, amma vətəndaş mövqeli inanclı Müntəzir Əl-Zeydi bir anlıq hərəkəti ilə bütün dünyanın gündəminə möhürünü vurdu. Onun ölkəsindəki Buş administrasiyası tərəfindən törədilən zülmlərə öz etirazını Buşa ayaqqabı tolazlamaqla bildirən Müntəzir, özünüifadə etmənin yeni bir üsulunu icad etmiş oldu. Çox keçmədi, onun bu hərəkəti dünayanın bir çox yerində baş verənlərə öz etirazını bildirənlərin əsas etiraz formasına çevrildi. Bu rəmzi etiraz bu günədək də davam edir. Baxmayaraq ki, bu hadisədən 3 keçməkdədir.

Növbəti qəhrəmanlıq bir çoxlarında bütlərin, tabuların sınmasına səbəb olan Davos hadisəsidir ki, bu ilin ilk ayında İsveçdə yaşanmışdır. Yəqin ki, nəyi qəsd etdiyimi hər kəs anladı. Söhbət Davos forumunda iki işğalçıya, iki zülmpərəstə, iki qəsbkara eyni anda cavab olan “Mənim üçün Davos bitmişdir, bir də Davosa gəlmərəm” sözlərinin sahibi Ərdoğandan gedir. 1 dəqiqə ərzində həm daşnak erməni tullantısına, həm də sionist cəllada layiq olduqları cavablarını verən müsəlman və türk baş nazir izzəti-nəfslə təvəlla-təbərrasına riayət etməklə bu forumu tərk etdi. Çox dartışıldı, çox bəhs edildi, çox müzakirə olundu Ərdoğanın bu addımı. Hələ də bu haqda müzakirələr gedir dünyada. Kimiləri bunu qələbə kimi dəyərləndirdi, kimiləri isə bunun qələbə ilə bir aidiyyətinin olmadığı fikrini əsaslandırmağa çalışdı. Amma bir sıra çılpaq həqiqətlər var ki, onlar baş verənlərin qələbədən başqa bir şey olmadığını isbatlayır.

Son qələbənin qəhrəmanı isə Azərbaycanımızın vicdanı oyaq millət vəkillərindən - həm bir insan olaraq, həm bir ana olaraq, həm də bütün bunları öz vətənində erməni işğalçıları tərfindən törədilməsinin şahidi olmuş bir xanımdır. Özü həm də “Mir Jenşinı” qəzetinin təsisçisi olan Lalə xanım Abbasova Fələstində törədilən sionist vəhşiliklərinə, Qəzzada və bütün Fələstində sionist cəlladları tərəfindən öldürülən körpələrin qanına şərik olmamaq üçün Azərbaycan-İsrail parlamentlərarası dostluq qrupunu tərk etmişdir. Bəli, alnı açıq, başını dik tutaraq sionist cinayətlərində şərik olmamaq və buna etiraz adına bu qrupun var olmasına etiraz edərək oranı tərk etmişdir. Bu da son ayın qələbəsidir.

* Bütün bu etirazlar ədalətin zülm, insanlığın vəhşiliyin, vicdanın vicdansızlıq, oyaq qəlblərin qəsavət və daşlaşmış ət parçaları üzərində qələbəsidir.
* Bunlardan hər kim danışsa da, danışmasa da bu addımları atanlar qaliblərdir. Çünki, onlar nəinki özlərinin, özləri ilə bərabər təmsil etdikləri dinin vacibatına riayət edərək mənsub olduqları xalqların da etirazlarını ifadə etmişlər. Özləri ilə yanaşı, öz xalqlarının vicdan səslərinə çevrilə bilmişlər.
* Kimlər ki, bu addımları qələbədən uzaqlıq adlandırır, hətta bu yazıya cavab versələr də qələbədir, verməsələr də.