Islam Times - Azərbaycan Qüds problemi ilə bağlı Fələstinə dəstək oldu

IslamTimes - "Bizim həm Fələstin, həm İsraillə sıx əlaqələrimiz var. Lakin bu, işğal məsələsində Fələstini dəstəkləməyə mane olmur..."

APA-nın məlumatına görə, BMT və İƏT tərəfindən təşkil olunmuş tədbirdə beynəlxalq təşkilatların təmsilçiləri və diplomatik korpusun nümayəndələri iştirak edib.
Azərbaycan Xarici İşlər Nazirliyinin xüsusi tapşırıqlar üzrə səfiri Şahin Abdullayev deyib ki, Qüds məsələsi həlli olunmadan Ərəb-İsrail münaqişəsi həll edilməyəcək.
Azərbaycanın Qüds məsələsinə aid BMT qətnamələrinin dəstəklədiyini deyən Ş. Abdullayev hazırda bölgədəki mənfi halların vəziyyəti daha da gərginləşdirdiyini və fələstinlilərin vəziyyətini çətinləşdirdiyini deyib. O, Şərqi Qüdsdə yaşayan fələstinlilərin müqəddəs yerlərlə bağlı mövqeyini və BMT-nin iki dövlətin yanaşı yaşaması üzrə qətnamələri dəstəklədiyini vurğulayıb.
"Bizim həm Fələstin, həm İsraillə sıx əlaqələrimiz var. Lakin bu, işğal məsələsində Fələstini dəstəkləməyə mane olmur. Əgər BMT ikili standartlardan uzaqlaşsa, nəyəsə nail olmaq olar. Bizim İsraillə mədəni, hərbi, siyasi əlaqələrimiz Fələstinə siyasi dəstək verməyimizə mane olmur. Biz təzyiq edə bilmərik, amma mövqeyimizi bildirə bilərik. Çünki Azərbaycan da işğal problemi ilə üzləşib və buna görə dəqiq mövqe tutmağa məcburuq", - deyə o vurğulayıb.