Analoqsuz “cinayət”: Nardaran şəhidinin oğlu atasının məzarının şəklini paylaşdığı üçün həbs edildi

2015-ci il noyabrın 26-da Azərbaycan Respublikası hüquq-mühafizə orqanlarının Nardaranda vətəndaşların yaşayın mənzillərinə etdiyi basqın zamanı şəhid edilən sakinlərdən biri Rəfael Bünyadovun oğlu Hüseynağa Bünyadov da həbs olunub.

1998-ci il təvəllüdlü H.Bünyadov noyabrın 20-də saxlanılıb və az sonra polisin qanuni tələbinə tabe olmamaq ittihamı ilə məhkəmə qarşısına çıxarılıb. Sabunçu Rayon Məhkəməsinin qərarı ilə ona 30 sutka inzibati həbs cəzası verilib.

17 yaşlı H.Bünyadovun yaxınları polisə müqavimət ittihamının yalan olduğunu, polislərin onu Nardaranda yaşadığı evin qarşısından tutub apardığını deyir.

Yaxınlarının sözlərinə görə, Hüseynağa bir neçə gün öncə Facebook səhifəsində Nardaran əməliyyatında öldürülən dörd nəfərin məzarının fotosunu paylaşmışdı. Onların fikrincə, H.Bünyadovu bu paylaşıma görə cəzalandırıblar.

«Bu uşağın heç 18 yaşı tamam olmayıb, nə istəyirlər ondan? Atasını öldürdülər, əmisini öldürdülər, başqa bir əmisini iflic eləyib, yatağa saldılar, bəs deyil bunlara?», – H.Bünyadovun yaxınları belə deyib.