اسلام ٹائمز 4 Jan 2019 گھنٹہ 12:13 https://www.islamtimes.org/ur/news/770143/کے-پی-پولیس-قبائلی-اضلاع-میں-فرائض-کی-انجام-دہی-کیلئے-تیار-ہے -------------------------------------------------- ٹائٹل : کے پی پولیس قبائلی اضلاع میں فرائض کی انجام دہی کیلئے تیار ہے -------------------------------------------------- چیف سیکرٹری کو مراسلے کے ذریعے آگاہ کیا گیا ہے کہ محکمہ پولیس نے قبائلی اضلاع میں پولیس تعیناتی سے متعلق تمام تر اہم اُمور نمٹا دیئے ہیں، صوبائی پولیس کے سربراہ چیف سیکرٹری کو قبائلی اضلاع میں پولیس تعیناتی پر تفصیلی بریفنگ دینگے جس کیلئے اُن سے تاریخ مقرر کرنیکی درخواست کی گئی ہے۔ متن : اسلام ٹائمز۔ خیبر پختونخوا حکومت نے فاٹا انضمام کے بعد قبائلی اضلاع میں پولیس تعیناتی کے عمل کو حتمی شکل دیدی ہے۔ ذرائع کے مطابق صوبائی پولیس سربراہ صلاح الدین خان چیف سیکرٹری کو قبائلی اضلاع میں پولیس تعیناتی پر بریفنگ دیں گے۔ سنٹرل پولیس آفس کے ذرائع کے مطابق ایک خصوصی مراسلے میں صوبائی پولیس سربراہ نے چیف سیکرٹری کو آگاہ کیا ہے کہ محکمہ پولیس نے قبائلی اضلاع میں پولیس تعیناتی سے متعلق تمام تر اہم اُمور نمٹا دیئے ہیں۔ مزید یہ کہ اعلٰی پولیس افسران متعلقہ قبائلی اضلاع کا تفصیلی دورہ کرچکے ہیں۔ اس کے علاوہ اعلٰی سطحی اجلاسوں میں قبائلی اضلاع میں پولیس تعیناتی اور محکمہ پولیس کی ضروریات پر سیر حاصل بحث بھی ہو چکی ہے جس میں تمام پہلوؤں کا جائزہ لیا گیا ہے۔ لہٰذا ضروری کارروائیوں کی تکمیل کے بعد صوبائی پولیس کے سربراہ چیف سیکرٹری کو قبائلی اضلاع میں پولیس تعیناتی پر تفصیلی بریفنگ دیں گے جس کیلئے اُن سے تاریخ مقرر کرنے کی درخواست کی گئی ہے۔