اسلام ٹائمز 7 Jul 2022 گھنٹہ 10:12 https://www.islamtimes.org/ur/news/1003202/مریم-اورنگزیب-کی-ڈی-جی-ا-ئی-ایس-پی-ا-ر-سے-ملاقات-پاکستان-75ویں-سالگرہ-شایان-شان-طریقے-منانے-کا-فیصلہ -------------------------------------------------- ٹائٹل : مریم اورنگزیب کی ڈی جی آئی ایس پی آر سے ملاقات، پاکستان کی 75ویں سالگرہ شایان شان طریقے سے منانے کا فیصلہ -------------------------------------------------- پی ٹی وی نیوز کے مطابق وزارت اطلاعات و نشریات اور آئی ایس پی آر نے ملک بھر میں قیام پاکستان کی ڈائمنڈ جوبلی تقریبات شایان شان طریقے سے منانے کے لئے پلان کا جائزہ لیا۔ متن : اسلام ٹائمز۔ وفاقی وزیر اطلاعات مریم اورنگزیب نے راولپنڈی میں ڈی جی آئی ایس پی آر جنرل بابر افتخار سے ملاقات کی ہے۔ سرکاری ٹی وی کے مطابق ملاقات میں پاکستان کی 75ویں سالگرہ شایان شان طریقے سے منانے کا فیصلہ کیا گیا ہے، ڈائمنڈ جوبلی جشن کو قومی یکجہتی، اتحاد کے فروغ کا یادگار موقع بنایا جائے گا، تقریبات میں پاکستان کی تمام ثقافتوں اور رنگوں کو شامل کیا جائے گا۔ پی ٹی وی نیوز کے مطابق وزارت اطلاعات و نشریات اور آئی ایس پی آر نے ملک بھر میں قیام پاکستان کی ڈائمنڈ جوبلی تقریبات شایان شان طریقے سے منانے کے لئے پلان کا جائزہ لیا، جائزہ اجلاس میں وفاقی وزیر اطلاعات و نشریات مریم اورنگزیب اور ڈائریکٹر جنرل آئی ایس پی آر میجر جنرل بابر افتخار نے اجلاس میں شرکت کی۔ اجلاس میں قیام پاکستان کی 75 ویں سالگرہ کے حوالے سے مجوزہ تقریبات اور تیاریوں کے انعقاد کا جائزہ لیا گیا، اجلاس میں وزارت اطلاعات و نشریات اور آئی ایس پی آر کی طرف سے 75 سالہ تقریبات کے حوالے سے تفصیلی بریفنگ دی گئی، جشن آزادی کے موقعے پر ملی نغموں کے مقابلے اور اس میں حصہ لینے والوں سے متعلق تفصیلات سے آگاہ کیا گیا، بریفنگ میں بتایا گیا کہ ملی نغمے کے مقابلوں میں حصہ لینے کی تاریخ 30 جون مقرر کی گئی تھی، یکم سے 9 جولائی تک مقابلوں میں شریک ہونے والوں کو شارٹ لسٹ کیا جائے گا، شارٹ لسٹ کئے جانے والوں کو اسلام آباد بلایا جائے گا، مقابلہ جیتنے والے امیدوار کا ملی نغمہ 11 سے 14 اگست تک قومی نشریاتی رابطے پر نشر ہو گا۔ دنیا بھر میں تمام پاکستانی سفارت خانوں میں بھی 75 ویں سالگرہ کے حوالے سے تقریبات منعقد کی جائیں گی، ڈائمنڈ جوبلی کے جشن کو قومی یک جہتی، اتحاد اور یگانگت کے فروغ کا یادگار موقع بنایا جائے گا۔ تقریبات میں ملک بھر کی تمام ثقافتوں اور وفاق پاکستان کے تمام رنگوں کو شامل کیا جائے گا، نوجوانوں کی جشن آزادی تقریبات اور مقابلوں میں بھرپور شرکت یقینی بنائی جائے گی۔ وفاقی وزیر اطلاعات مریم اورنگزیب اور ڈی جی آئی ایس پی آر میجر جنرل بابر افتخار نے ملک گیر تقریبات کے انتظامات پر اطمینان کا اظہار کیا، وزیر اطلاعات نے قومی تقریبات کی تیاریاں کرنے والی ٹیموں اور ڈیپارٹمنٹس کے جذبے کی تعریف کی۔