اسلام ٹائمز 27 Sep 2022 گھنٹہ 22:00 https://www.islamtimes.org/ur/news/1016460/اسحاق-ڈار-کے-وزیر-خزانہ-بننے-سے-ملکی-معیشت-میں-بہتری-آئے-گی-اکرام-اللہ-دھاریجو -------------------------------------------------- ٹائٹل : اسحاق ڈار کے وزیر خزانہ بننے سے ملکی معیشت میں بہتری آئے گی، اکرام اللہ دھاریجو -------------------------------------------------- اپنی رہائش گاہ پر میڈیا سے گفتگو کرتے ہوئے وزیر صنعت سندھ نے کہا کہ امید ہے جلد معیشت صحیح ٹریک پر گامزن ہو جائے گی، تحریک انصاف کی حکومت نے ملک تباہ کرنے میں کوئی کسر نہیں چھوڑی تھی۔ متن : اسلام ٹائمز۔ سندھ کے وزیر برائے صنعت، تجارت و امداد باہمی جام اکرام اللہ دھاریجو نے کہا ہے کہ اپنی ٹیم کا انتخاب کرنے کا وزیراعظم کو اختیار حاصل ہے، اگر وزیراعظم نے اسحاق ڈار کو کابینہ کا حصہ بنایا ہے تو کچھ سوچ کر ہی بنایا ہوگا۔ جام اکرام اللہ دھاریجو نے کہا کہ امید ہے اسحاق ڈار کے آنے سے ملکی معیشت میں بہتری آئے گی، تحریک انصاف کی چار سالہ حکومت نے جو بگاڑ پیدا کیا تھا اس کو صحیح کرنے میں وقت لگ رہا ہے۔ انہوں نے کہا کہ امید ہے جلد معیشت صحیح ٹریک پر گامزن ہو جائے گی، تحریک انصاف کی حکومت نے ملک تباہ کرنے میں کوئی کسر نہیں چھوڑی تھی۔ جام اکرام اللہ دھاریجو نے کہا کہ پورے سندھ میں ریلیف کا کام بھرپور طریقے سے جارہی ہے، وزیراعلی سندھ اپنی کابینہ کے اراکین کے ہمراہ فیلڈ میں موجود ہیں۔ انہوں نے کہا کہ چیئرمین بلاول بھٹو زرداری کی ہدایت ہے کہ سیلاب متاثرین کی ہر ممکن مدد کی جائے۔ وزیراعلیٰ سندھ ہر ضلع کا دورہ کررہے ہیں۔ جام اکرام اللہ دھاریجو نے کہا کہ پاکستان پیپلز پارٹی نے ہر مشکل وقت میں عوام کا ساتھ دیا ہے اور اس مشکل گھڑی میں بھی عوام کے ساتھ ہیں۔