اسلام ٹائمز 16 Aug 2022 گھنٹہ 14:24 https://www.islamtimes.org/ur/news/1009453/عامر-لیاقت-کا-پوسٹ-مارٹم-کرانے-فیصلہ-کالعدم-قرار -------------------------------------------------- ٹائٹل : عامر لیاقت کا پوسٹ مارٹم کرانے کا فیصلہ کالعدم قرار -------------------------------------------------- مرحوم  کے ورثا کے وکیل ضیا اعوان ایڈوکیٹ نے مؤقف دیا کہ عامر لیاقت حسین کا پوسٹ مارٹم کرانے سے متعلق آرڈر ختم کر دیا گیا، بچوں کو تکلیف دی گئی۔ متن : اسلام ٹائمز۔ شہر قائد کی مقامی عدالت نے مرحوم اینکر پرسن و رکن قومی اسمبلی عامر لیاقت کا پوسٹ مارٹم کرانے کا فیصلہ کالعدم قرار دے دیا۔ تفصیلات کے مطابق کراچی سٹی کورٹ میں ایڈیشنل ڈسٹرکٹ اینڈ سیشن جج شرقی کی عدالت نے اینکر پرسن عامر لیاقت کے پوسٹ مارٹم کرانے کے فیصلے کے خلاف اپیل پر فیصلہ سنا دیا۔ عدالت نے جوڈیشل مجسٹریٹ شرقی کا فیصلہ کالعدم قرار دے دیا۔ جوڈیشل مجسٹریٹ شرقی نے 18 جون کو عامر لیاقت کا پوسٹ مارٹم کرانے کا حکم دیا تھا۔ شہری عبد الاحد کی جانب سے عامر لیاقت کے پوسٹ مارٹم کرانے کی درخواست دائر کی تھی۔ عامر لیاقت کے ورثاء نے پوسٹ مارٹم کرانے کی مخالفت کی تھی۔ مرحوم  کے ورثا کے وکیل ضیا اعوان ایڈوکیٹ نے مؤقف دیا کہ عامر لیاقت حسین کا پوسٹ مارٹم کرانے سے متعلق آرڈر ختم کر دیا گیا، بچوں کو تکلیف دی گئی۔ عامر لیاقت کی سابق اہلیہ بشریٰ اقبال نے کہا کہ کسی نے ہم پر جائداد کا الزام لگایا، کسی نے کچھ کہا، ہم یہ چاہتے تھے کہ ان کی لاش کی تضحیک نہ ہو، دانیہ نے جو حرکت کی، وہ سب کے سامنے ہے، دانیہ شاہ کیخلاف کارروائی ہو رہی ہے، سزا دلوا کر رہیں گے، ایف آئی اے میں معاملہ انکوائری کی اسٹیج پر ہے۔