اسرائیلی حساس اداروں شاباک، موساد، فضائیہ، ایمرجنسی رسپانس فورس حتیٰ پولیس کے بعض اہلکاروں نے ڈیوٹی کرنے سے انکار کر دیا۔ اس کے بعد حکومتی عہدیداروں نے بھی استعفے کی دھمکیاں دینا شروع کر دیں۔ جن میں رواں ہفتے صیہونی وزیر جنگ "یوآف گالانٹ" کی دھمکی اور گذشتہ روز اس کی برطرفی عالمی میڈیا کی زینت بنی رہی۔ اس صورتحال میں اپوزیشن پارٹیوں کی جانب سے نتین یاہو کو شدید تنقید کا سامنا ہے۔ اس سلسلے میں Israel My Home کے سربراہ "اویگدور لیبرمین" نے گذشتہ ہفتے کہا کہ نتین یاہو اسرائیل کے لئے حزب اللہ اور ایران سے زیادہ خطرناک ہے۔ رواں ہفتے اس صیہونی سیاستدان نے حد ہی کر دی، جب اس نے کہا کہ نتین یاہو حزب اللہ کے سامنے چوہا اور اپنے عوام کے سامنے شیر ہے۔ قارئین مذکورہ بالا باتوں کا مطلب یہ نہیں ہے کہ اسرائیلی حکومت بُری ہے اور صیہونی آبادکار اچھے۔ یہ آبادکار ویسے ہی غاصب ہیں، جیسے یہ رژیم قابض۔ لیکن حالیہ صورتحال میں دونوں آپس میں متصادم ہیں۔ یہ تو تھے صیہونی بمقابلہ صیہونی۔ اب ذرا مظلوم فلسطینیوں کی جانب بھی دیکھیں۔ جنہوں نے شروع دن سے ہی اسرائیل اور اس کے غاصب عوام کے ہر طرح کے جرائم کو سہا ہے۔ 

شاید فلسطینیوں کو یہ بات بہت پہلے ہی سمجھ آچکی تھی کہ مقاومت (مزاحمت) میں ہی ان کی نجات ہے۔ اس وقت مقبوضہ فلسطین کا کوئی کونہ ایسا نہیں، جہاں صیہونیوں کو مزاحمت کا سامنا نہ ہو۔ مزاحمت کی شرح میں زمان اور مکان میں تبدیلیوں کی وجہ سے اضافہ یا کمی ہوتی رہتی ہے۔ اضافے کی صورت میں اسرائیلی رژیم بعض عرب ممالک کی جانب لپکتی ہے اور عالمی اداروں کی سرپرستی میں کبھی العقبہ اور کبھی شرم الشیخ میں امن اجلاس منعقد کرتی رہتی ہے۔ بہرحال زمینی مینڈیٹ نہ ہونے اور صیہونی وعدہ خلافیوں کی وجہ سے یہ اجلاس کچھ عرصے بعد اپنی موت آپ مر جاتے ہیں۔ فلسطین پر قبضے کے اولین سالوں میں مقابلہ یکطرفہ ہی لگتا تھا، لیکن فلسطینی اب اسرائیل کو اس کے ہر جرم کا ہر ممکنہ وسیلے سے جواب دیتے ہیں۔ حالیہ مہینوں میں ہونے والے کامیاب فدائی حملوں نے اسرائیلی سکیورٹی اداروں کی قلعی کھول دی ہے۔ سب سے اہم بات یہ کہ حال ہی میں اسرائیلی میڈیا میں حزب اللہ لبنان کے سربراہ سید حسن نصر اللہ کے بیانات اور اصطلاحات مورد بحث  ہیں۔ سید حسن نصر اللہ اپنے بیانات میں بار ہا کہہ چکے ہیں کہ اسرائیل اپنے خاتمے کے بالکل نزدیک ہے۔

اس کے علاوہ 2000ء میں لبنان سے اسرائیلیوں کے فرار کے موقع پر سید حسن نصر اللہ نے ایک تقریر کی تھی اور اسرائیل کو مکڑی کے جالے سے بھی کمزور قرار دیا تھا۔ حزب اللہ کے سربراہ نے اسی اصطلاح کو ایک بار پھر دہرایا ہے۔ جس پر اسرائیلی ماہرین اور تجزیہ کار خاصے متحیر دکھائی دیتے ہیں۔ دوسری جانب نتین یاہو مقاومتی کمانڈروں کو قتل کروا کر صیہونی عوام میں اپنی کھوئی ہوئی ساکھ بحال کرنا چاہتا ہے۔ فلسطینیوں پر جارحیت انجام دے کر صیہونی آبادکاروں کی توجہ اپنے حکومتی مسائل سے ہٹانا چاہتا ہے۔ فلسطین یا مقبوضہ فلسطین میں قائم اس غاصب ریاست کے داخلی منظرنامے پر نگاہ ڈالنے کے بعد معلوم ہوتا ہے کہ یہ رژیم اپنے اختتام کی جانب بڑھ رہی ہے۔ مانا کہ ایسا ہونا اتنا آسان نہیں ہے، لیکن جو کچھ ہو رہا ہے، اس کا حتمی نتیجہ کچھ ایسا ہی لگ رہا ہے۔