ایم ڈبلیو ایم کا امریکی سفارتخانہ کے باہر آزادی فلسطین مارچ

ترتیب و تدوین: سید عدیل زیدی

فلسطینی مظلومین کی حمایت اور غاصب اسرائیل کی بربریت کے خلاف پاکستان میں مختلف مذہبی و سیاسی جماعتوں کی جانب سے احتجاجی مظاہروں، ریلیوں اور اجتماعات کا سلسلہ جاری ہے، مجلس وحدت مسلمین پاکستان کی جانب سے بارہ نومبر کو اسلام آباد میں آبپارہ سے امریکی سفارتخانہ تک ایک عظیم ’’الشان آزادی فلسطین مارچ‘‘ کا اہتمام کیا گیا، جس میں ہزاروں مرد و خواتین اور بچوں نے شرکت کی۔ اس پرشکوہ اجتماع کے شرکاء نے فلسطینی و پاکستانی پرچم لہراتے ہوئے اسرائیل کے خلاف صدائے احتجاج بلند کی۔ علامہ راجہ ناصر عباس جعفری کی قیادت میں ہونے والے اس مارچ میں ایم ڈبلیو ایم کے رہنماوں کے علاوہ مختلف مذہبی و سیاسی جماعتوں کے قائدین، علمائے کرام، دانشوروں، طلبہ سمیت مختلف شعبہ ہائے زندگی سے تعلق رکھنے والے افراد نے بھرپور شرکت کی۔ اس موقع پر اسلام آباد کی فضاء ’’مردہ باد امریکہ اور مردہ باد اسرائیل‘‘ کے نعروں سے گونج رہی تھی۔ مارچ کے شرکاء نے اپنے فلسطینی بہن، بھائیوں، بچوں اور مجاہدین کیساتھ بھرپور اظہار یکجہتی کیا۔

مارچ کے شرکاء سے خطاب کرتے ہوئے جماعت اسلامی پاکستان کے مرکزی نائب صدر لیاقت بلوچ نے کہا کہ میں فلسطینی عوام کے لیے اس ایمان پرور اجتماع کے لیے آپ باضمیر پاکستانیوں کو مبارکباد پیش کرتا ہوں، ہم او آئی سی کے بے نتیجہ اجلاس کی مذمت اور اس پر افسوس کرتے ہیں، انہیں دوبارہ سے مل بیٹھ کر عوامی امنگوں کے مطابق فیصلے کرنے چاہئیں۔ انہوں نے کہا کہ بے غیرت و بے حمیت حکمرانوں سے مسلم امہ بیزاری کا اظہار کرے گی، مجلس وحدت مسلمین کے لاہور کے اجتماع کی حمایت کرتے ہیں۔ پاکستان کی سرزمین پر اسرائیل سے تعلقات استوار کرنے کی کبھی اجازت نہیں دینگے، وہ دن ضرور آئے گا، جب پاکستان کا بچہ بچہ فلسطین کے لئے نکلے گا۔ علاوہ ازیں مجلس علماء مکتب اہلبیتؑ کے مرکزی صدر علامہ سید حسنین عباس گردیزی نے اپنے خطاب میں کہا کہ ہمارا یہاں مجتمع ہونا اسرائیلی مظالم کے خلاف غم و غصہ کا اظہار ہے، فلسطینی مظلومین اسرائیلی سفاکیت کا مقابلہ ایمان کی قوت سے کر رہے ہیں۔ پورا فلسطین فلسطینیوں کا ہے، دریا سے سمندر تک، ان شاء اللہ یہ فلسطینیوں کا ہو کر رہے گا۔

علاوہ ازیں متحدہ جمیعت اہلحدیث پاکستان کے صدر سید ضیاء اللہ شاہ بخاری نے مارچ سے اپنے خطاب میں کہا کہ مظلوم فلسطینیوں کی حمایت میں یہ عظیم الشان اجتماع اسلام آباد کے عوام کی غیرت و حمیت کا عکاس ہے، اس وقت ہمیں تمام تر اختلافات کو پس پشت ڈال کر مظلوم فلسطینیوں کے ساتھ کھڑے ہونے کی ضرورت ہے۔ فلسطینی خود کو تنہاء نہ سمجھیں، پاکستان کا بچہ بچہ ان کے ساتھ کھڑا ہے۔ جماعت اہل حرم کے سربراہ مفتی گلزار احمد نعیمی نے خطاب کرتے ہوئے کہا کہ ہمیں وحدت کا اظہار کرتے ہوئے یہ پیغام دینا چاہیئے کہ غزہ کے شہداء کا خون ہمارا خون ہے، مسلم حکمرانوں کو شرم آنی چاہیئے کہ وہ بے حسی کی برترین مثال بنے ہوئے ہیں۔ انہوں نے مزید کہا کہ فلسطینیوں کے ساتھ اظہار یکجہتی کرنا اولین مقصد ہونا چاہیئے، اسلام دشمن قوتوں کی مسلم امہ کے درمیان انتشار کی کوششیں کامیاب نہیں ہوں گی۔ مظلوم فلسطینیوں پر صیہونی بمباری پر اقوام عالم کیوں خاموش ہے؟ کہاں ہیں انسانی حقوق کی تنظیمیں۔؟

اپوزیشن لیڈر جی بی میثم کاظم نے کہا کہ پوری دنیا کے باضمیر انسان فلسطینی مظلومین کے ساتھ کھڑے ہیں، کہاں ہیں مسلم امہ کی قیادت کا دم بھرنے والے بے حس حکمران۔؟ عظیم الشان اجتماع سے دیگر مقررین میں سید صفدر حسین گیلانی، مرکزی جنرل سیکرٹری سید ناصر عباس شیرازی، علامہ اعجاز بہشتی، صوبائی صدور ایم ڈبلیو ایم علامہ جہانزیب علی جعفری، علامہ سید علی رضوی، سیکریٹری سیاسیات سندھ سید علی حسین نقوی، علمائے امامیہ کے رہنماء مولانا ضیغم عباس، آئی ایس او پاکستان کے نائب صدر شہریار حسین اور ظہیر عباس نقوی نے بھی خطاب کیا۔ اس مارچ سے مرکزی خطاب مجلس وحدت مسلمین پاکستان کے چیئرمین علامہ راجہ ناصر عباس جعفری نے کیا۔ اس موقع پر ان کا کہنا تھا کہ آج کا یہ عظیم اجتماع بصیرت و آگاہی کا ثبوت ہے، ہمارے قائد شہید علامہ عارف الحسینی نے سرزمین پاکستان پر امریکہ کو للکارا، وہ آزاد مملکت کے داعی تھے، وہ بیداری اور آزادی کی تحریک کا پرچم لے کر ملک کے طول و عرض کا سفر کرتے تھے، وہ استعماری طاقتوں کے مذموم عزائم سے آگاہ کرتے تھے، جس کی پاداش میں انہیں شہید کر دیا گیا۔

انہوں نے کہا کہ اسرائیل مکڑی کے جالے سے بھی زیادہ کمزور ہے، ہمارے رہبر کہتے ہیں کہ یہ معرکہ حق و باطل ہے، حماس نے حملہ کیا ہی نہیں بلکہ انہوں نے اپنا دفاع کیا ہے، کیا کشمیر میں اگر کشمیری انڈین مظالم کیخلاف اٹھ کھڑے ہوں تو کیا یہ غلط ہے؟ کہتے ہیں کہ اسرائیلی بہت پیشرفتہ ہے، ہاں انہوں نے تمہیں قتل کرنے کے لیے ترقی کی ہے۔ انہوں نے کہا کہ اسرائیل کے ساتھ  تعلقات قائم کرنا شیطان اور ابلیس سے تعلقات استوار کرنا ہے، شیعہ سنی ملکر نکلیں گے، سلام ہو پاراچنار کے جوانوں پر جنہوں نے شیعہ، سنی کو لڑانے کی سازش کو ناکام بنایا، ہمارا سلام ہو فلسطینی ماؤں، بہنوں، بیٹیوں پر، آپ کی فداکاری پر، آپ کی استقامت پر۔ غزہ کی سرزمین اسرائیلیوں کا قبرستان بن رہی ہے۔ انہوں نے مزید کہا کہ آج لبنانی، یمنی اور عراقی مقاومت نے اسرائیل کو گھیرا ہوا ہے، امریکہ سب سے بڑا شیطان ہے، جو اس جنایت کاری میں اسرائیل کا سرپرست ہے، پاکستان کے عوام امریکہ کو سب سے بڑا دشمن سمجھتے ہیں، آنے والے الیکشن میں پاکستانیوں کے ساتھ ملکر ان قوتوں کو شکست دیں گے، جو امریکہ کا ساتھ دیتے ہیں، ایک شکست غزہ میں ہوگی اور ایک شکست پاکستان میں ہوگی، 26 نومبر کو بڑا اجتماع لاہور میں ہوگا، جس میں ہم سب شرکت کریں گے، لاہور کی غیور عوام تیاری کریں۔