امام محمد باقر (ع) کی علمی تحریک

تحریر: محمد جان حیدری

سنہ 94 ہجری سے 114 ہجری تک کا زمانہ فقہی مسالک کے ظہور اور تفسیر قرآن کے سلسلہ میں نقل حدیث کے عروج کا زمانہ ہے اور اس کا سبب یہ ہے کہ اس دور میں بنی امیہ کی سلطنت حضیض زوال کی طرف سرکنے لگی تھی اور کافی حد تک کمزور ہوچکی تھی۔ اس زمانے میں اموی عمائدین کے درمیان اقتدار کی رسہ کشی زوروں پر تھی۔ اہل سنت کے علماء میں سے شہاب زہری، مکحول، ہشام ابن عروہ وغیرہ جیسے افراد نقل حدیث کا اہتمام کرتے تھے اور فتویٰ دیتے تھے اور بعض دوسرے افراد اپنے عقائد کی ترویج میں مصروف تھے؛ جن میں خوارج، مرجئہ، کیسانیہ اور غالی خاص طور پر قابل ذکر ہیں۔ حضرت امام باقر (ع) نے اس دور میں وسیع علمی تحریک کی بنیاد رکھی، جو آپ کے فرزند ارجمند امام حضرت ابو عبداللہ جعفر ابن محمد صادق (ع) کے دور میں عروج کو پہنچی۔ آپ علم، زہد اور فضیلت میں اپنے دور کے ہاشمی اکابرین میں سرفہرست تھے اور علم دین، سنت، علوم قرآن، سیرت اور فنون اخلاق و آداب جیسے موضوعات میں جس قدر حدیثیں اور روایات آپ سے منقول ہیں، وہ امام حسن اور امام حسین کے کسی بھی دوسرے فرزند سے نقل نہيں ہوئی ہیں۔

شیعہ فقہی احکام اگرچہ اس وقت تک صرف اذان، تقیہ، نماز میت وغیرہ جیسے مسائل کی حد تک واضح ہوچکے تھے، لیکن حضرت امام باقر (ع) کے ساتھ اس سلسلے میں نہایت اہم قدم اٹھائے گئے اور ایک قابل تحسین علمی و ثقافتی تحریک شیعیان آل رسول (ص) کے درمیان شروع ہوئی۔ اسی زمانے میں اہل تَشَیُّع نے فقہ، تفسیر اور اخلاق پر مشتمل ثقافت کی تدوین کا کام شروع کیا۔(1) حضرت امام باقر (ع) نے اصحاب قیاس کی دلیلوں کو شدت سے ردّ کر دیا اور دیگر منحرف اسلامی فرقوں کے خلاف بھی سخت موقف اپنایا اور یوں مختلف موضوعات میں اہل بیت (ع) کے صحیح اعتقادی دائرے کو واضح اور الگ کرنے کی (کامیاب) کوشش کی۔ آپ نے خوارج کے بارے میں فرمایا: "خوارج نے اپنی جہالت کے بموجب عرصہ حیات اپنے لئے تنک کر دیا ہے، دین اس سے کہیں زیادہ نرم و ملائم اور لچکدار ہے جو وہ سمجھتے ہیں۔" حضرت امام باقر (ع) کی علمی شہرت نہ صرف حجاز میں بلکہ عراق اور خراسان تک بھی پہنچ چکی تھی؛ چنانچہ راوی کہتا ہے: میں نے دیکھا کہ خراسان کے باشندوں نے آپ کے گرد حلقہ تشکیل دیا ہے اور اپنے علمی سوالات آپ سے پوچھ رہے ہیں۔"

اگلی سطور میں اختصار کے ساتھ مختلف موضوعات (علم و سائنس کے شعبوں) میں امام (ع) کی علمی میراث کی طرف اشارہ کیا جا رہا ہے:
تفسیر
امام (ع) نے اپنے اوقات کا ایک حصہ تفسیری موضوعات و مباحث کے لئے مختص کر رکھا تھا اور تفسیری حلقہ تشکیل دے کر علماء اور عام لوگوں کے سوالات و اعتراضات کا جواب دیتے تھے۔ کہا جاتا ہے کہ امام باقر (ع) نے تفسیر قرآن میں ایک کتاب بھی تصنیف کی تھی، جس کی طرف محمد ابن اسحٰق ندیم نے اپنی کتاب "الفہرست" میں بھی اشارہ کیا ہے۔(2)] امام (ع) قرآن کی شناخت و معرفت کو اہل بیت تک محدود سمجھتے تھے، کیونکہ وہ محکمات کو متشابہات اور ناسخ و منسوخ سے تمیز دینے کی قوت رکھتے ہیں؛ اور ایسی خصوصیت اہل بیت (ع) کے سوا کسی کے پاس نہيں پائی جاسکتی۔ اسی بنا پر آپ نے فرمایا ہے: "کوئی بھی چیز تفسیر قرآن کی مانند لوگوں کی عقل سے دور نہيں ہے؛ کیونکہ ایک آیت کا آغاز متصل ہے ایک مسئلے کے بارے میں، اور یہ کلامِ متصل کئی وجوہ کی طرف لوٹایا جاتا ہے۔"

حدیث
امام باقر (ع) نے احادیث نبوی کو خاص شکل میں توجہ اور اہمیت دی تھی، حتی کہ جابر بن یزید جعفی نے آپ سے رسول اللہ (ص) کی ستر ہزار حدیثیں نقل کی ہیں؛ جیسا کہ ابان بن تغلب اور دوسرے شاگردوں نے اس عظیم ورثے میں سے بڑے مجموعے نقل کئے ہیں۔ امام (ع) نے صرف نقل حدیث اور ترویج حدیث ہی پر اکتفا نہيں کیا بلکہ اپنے اصحاب کو فہمِ حدیث اور ان کے معانی کے ادراک کا اہتمام کرنے کی ترغیب دلائی ہے۔ مثلاً آپ نے فرمایا ہے: "ہمارے پیروکاروں کے مراتب کو احادیث اہل بیت نقل کرنے اور ان کی معرفت و ادراک کی سطح دیکھ کر پہچانو، اور معرفت درحقیقت روایت کو پہچاننے کا نام ہے اور یہی درایۃ الحدیث ہے، اور روایت کی درایت و فہم کے ذریعے مؤمن ایمان کے اعلٰی درجات پر فائز ہوجاتا ہے۔"(3)]

کلام
امام باقر (ع) کے زمانے میں مناسب مواقع فراہم ہوئے، حکمرانوں کی طرف سے دباؤ اور نگرانی میں کمی آئی اور یوں مختلف عقائد و افکار کے ظاہر و نمایاں ہونے کے اسباب فراہم ہوئے اور یہی آزاد فضا بھی معاشرے میں انحرافی افکار کے معرض وجود میں آنے کا سبب بنی۔ ان حالات میں امام (ع) کو درست اور حقیقی شیعہ عقائد کی تشریح، باطل عقائد کی تردید کے ساتھ ساتھ متعلقہ شبہات و اعتراضات کا جواب بھی دینا پڑ رہا تھا؛ چنانچہ آپ (ع) ان امور کے تناظر میں ہی کلامی (و اعتقادی) مباحث کا اہتمام کرتے تھے؛ "ذات پرودگار کی حقیقت کے ادراک سے عقل انسانی کی عاجزی"  اور "واجب الوجود کی ازلیت" وغیرہ ان ہی مباحث میں سے ہیں۔ امام (ع) کی دیگر میراثیں بھی ہم تک آ پہنچی ہیں، جیسے فقہی میراث (4) اور تاریخی میراث(5)۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
منابع:
(1)۔ جعفریان، حیات فکری و سیاسی امامان شیعه، ص295
(2)۔ ابن ندیم، الفهرست، ص59 و شریف القرشی، باقر، حیاة الامام المحمد الباقر، ج1، ص174
(3)۔ شریف القرشی، باقر، حیاة الامام المحمد الباقر، ج1، ص140 و 141
(4)۔ مؤلفین کی ایک جماعت، پیشوایان ہدایت ج7، ص341 تا 347
(5) شیعہ ویکی پیڈیا