ترتیب و تنظیم: ٹی ایچ بلوچ
آئی ایس آئی کے سابق سربراہ جنرل (ر) اسد درانی اور انڈین را کے سابق سربراہ امرجیت سنگھ دلت کی مشترکہ تصنیف سپائی کرانیکلز خاصی تہلکہ خیز ثابت ہوئی۔ 255 صفحات کے ساتھ 33 ابواب پر مشتمل اس کتاب کی تیاری کے لئے دہلی میں مقیم معروف صحافی ادیتا سنہا سہولت کار بنے۔ دو حریف خفیہ ایجنسیوں کے سابق سربراہوں کے درمیان یہ طویل مکالمات 2016ء میں استنبول، بنکاک اور کھٹمنڈو میں ہوئے۔ معزول وزیراعظم کے بارہ مئی کے انٹرویو میں (جسے ڈان لیکس II کا نام دیا گیا) پاکستان میں ملی ٹینٹ تنظیموں اور نومبر 2008ء کے ممبئی حملوں کے حوالے سے تیس پینتیس الفاظ پر مشتمل گفتگو پر بعض حلقوں میں ہاہا کار مچ گئی تھی اور نوبت نیشنل سکیورٹی کمیٹی کے ہنگامی اجلاس تک جا پہنچی تھی۔ اب ہماری سپریم خفیہ ایجنسی کے سابق سربراہ تو پوری کتاب کے شریک مصنف بن گئے تھے۔ چنانچہ معزول وزیراعظم اب اس پر بھی نیشنل سکیورٹی کمیٹی کے اجلاس کا مطالبہ کر رہے تھے۔ سینیٹ کے سابق چیئرمین رضا ربانی نے یہ کہہ کر دریا کو کوزے میں بند کر دیا کہ کسی سویلین نے یہ حرکت کی ہوتی تو غداری کا فتویٰ لگ جاتا۔