ابوبکر البغدادی کی ہلاکت

تحریر:صابر ابو مریم
سیکرٹری جنرل فلسطین فاؤنڈیشن پاکستان
پی ایچ ڈی ریسرچ اسکالر، شعبہ سیاسیات جامعہ کراچی

ابوبکر البغدادی ذرائع ابلاغ اور دنیا کے لئے ایک معروف نام ہے، کیونکہ یہی وہ شخص تھا کہ جس کو داعش نامی دہشت گرد تنظیم کے سربراہ اور قائد کی حیثیت سے پیش کیا گیا تھا۔ چند دن بیشتر امریکی صدر نے سماجی رابطوں کی ویب سائٹ ٹوئٹر پر لکھا کہ کچھ بہت بڑا ہوا ہے۔ اس کے بعد مغربی ذرائع ابلاغ اور ان سے متاثر خلیجی ذرائع ابلاغ نے ایک ہی خبر کی رٹ لگا دی کہ شام اور عراق میں دہشت گرد گروہ داعش کا سربراہ ابوبکر البغدادی امریکی حملوں میں مارا گیا ہے۔ دراصل دنیا بھر میں ذرائع ابلاغ پر امریکی و صہیونی لابی کا مضبوط کنٹرول، دنیا کے ایک بہت بڑے حصہ کو جس سمت چاہتا ہے موڑ دیتا ہے۔ ہمیشہ مغربی سامراج نے ذرائع ابلاغ کو کنٹرول کے ذریعے دنیا میں بسنے والے لاکھوں کروڑوں انسانوں کی رائے کو بدلنے اور ان پر اثر انداز ہونے کی کوشش کی ہے۔ سوال یہ ہے کہ امریکی صدر نے ابوبکر البغدادی کو قتل کرنے کا جو دعویٰ کیا ہے، آخر کس حد تک سچائی رکھتا ہے یا یہ کہ اس کے پس پردہ مقاصد کیا ہوسکتے ہیں۔؟ دنیا اس حقیقت کو بخوبی جان چکی ہے کہ امریکہ نے پہلے طالبان قیادت بنائی اور بعد میں ان سے وابستہ اسامہ بن لادن کو پاکستان کے شہر ایبٹ آباد میں ایک فوجی آپریشن کے ذریعے ہلاک کرنے کا دعویٰ کیا۔

اب شام اور عراق میں خود امریکہ کی بنائی ہوئی داعش نامی دہشت گرد تنظیم کے سرغنہ ابوبکر البغدادی کو امریکہ نے ایک فوجی آپریشن میں ہلاک کرنے کا دعویٰ کیا ہے۔ امریکی صدر نے خود اس بات کا اعتراف کیا ہے کہ ان کے پیش رو امریکی صدور نے عراق اور شام پر مکمل کنٹرول حاصل کرنے کے لئے داعش نامی دہشت گرد تنظیم بنائی تھی۔ یہ بات واضح رہے کہ ابوبکر البغدادی کے پہلے بھی کئی مرتبہ مارے جانے کی اطلاعات مل چکی ہیں، جن کی کبھی تصدیق نہیں ہوسکی اور اسی طرح حالیہ امریکی آپریشن میں دہشتگرد تنظیم داعش کے سرغنہ کے قتل ہونے کی تصدیق باقی ہے۔ امریکہ جو غرب ایشیا کے خطے میں سنہ 2001ء کے بعد سے مسلسل فلسطین، لبنان، شام، افغانستان، عراق و ایران میں شکست کھا رہا ہے اور خطے پر اپنا تسلط قائم رکھنے میں ناکامی کے بعد داعش جیسے دہشت گرد گروہوں کی مدد سے بھی اپنے ناپاک عزائم کی تکمیل تک نہیں پہنچ پایا ہے۔ امریکی سرکار نے داعش کو اس لئے بنایا تھا، تاکہ شام و عراق کو کنٹرول کرسکیں اور اس خطے کو کئی حصوں میں تقسیم کریں، جبکہ اس سارے عمل کا فائدہ صہیونیوں کی غاصب اور جعلی ریاست اسرائیل کے حق میں تھا کہ اسے تحفظ فراہم ہوسکے۔

لیکن حقیقت یہ ہے کہ کئی سال تک داعش کو شام و عراق اور لبنان کے علاقوں میں اپنا قبضہ جمانے کی کوشش کرنے کے باوجود شکست کا سامنا رہا۔ حال ہی میں امریکی صدر کی جانب سے ابوبکر البغدادی کو قتل کر دینے کے دعویٰ نے امریکی سرکار پر مزید سوالات اٹھا دیئے ہیں۔ غرب ایشیائی ممالک کی سیاست پر نظر رکھنے والے ماہرین امور سیاسیات کا کہنا ہے کہ امریکہ نے ایسے وقت میں شام کے علاقہ ادلب میں کارروائی کی ہے، جب وہاں پہلے ہی ترکی کی فوجیں چڑھائی کرچکی ہیں۔ یہ امریکی آپریش بھی ترکی میں موجود امریکی بیس سے کیا گیا ہے۔ ماہرین کا کہنا ہے کہ امریکہ کو یہ خطرہ تھا کہ اگر ابوبکر البغداد ی ترک افواج کے ہاتھ زندہ سلامت آ جاتا ہے، تو پھر امریکیوں کے بہت سارے ایسے راز جو دنیا کے سامنے نہیں آئے ہیں، وہ سب کے سب آشکار ہو جائیں گے اور امریکہ کا سیاہ چہرہ دنیا کے سامنے مزید عیاں ہو جائے گا، تاہم امریکی سرکار نے اس علاقہ میں جلد بازی میں کارروائی کرتے ہوئے ابوبکر البغدادی کو ہلاک کرنے کا دعویٰ کر دیا ہے۔ کچھ ماہرین سیاسیات کا کہنا ہے کہ امریکہ کیونکہ شام و عراق میں داعش کا بانی ہے، لیکن دنیا کو باور کروانے کی کوشش کر رہا ہے کہ وہ داعش کے خلاف جنگ میں سرگرم عمل ہے۔

تاہم اب ایسے حالات میں کہ جب شام، ایران، روس اور حزب اللہ نے مشترکہ طور پر لبنان، شام اور عراق میں داعش کا صفایا کیا ہے، تو امریکہ خطے میں داعش کے خلاف اس کامیابی کو اسلامی مزاحمتی بلاک کے حصہ میں نہیں جانے دینا چاہتا اور یہی وجہ ہے کہ امریکی سرکار نے بغدادی جیسے دہشت گرد کو ہلاک کرنے کا دعویٰ کرکے خطے میں داعش پر فتح حاصل کرنے کا تمغہ اپنے سینہ پر سجانے کی ایک ناکام کوشش کی ہے۔ لیکن دنیا پہلے ہی اس بات کو جانتی ہے کہ امریکہ اور اسرائیل ہی ہیں کہ جنہوں نے خطے کے عرب خلیجی ممالک کے اشتراک سے نہ صرف داعش بلکہ متعدد دہشت گرد گروہ تشکیل دیئے تھے، جن کا کام شام کی تقسیم، عراق کی تقسم اور فلسطین کاز کو نقصان پہنچا کر صہیونیوں کی جعلی ریاست اسرائیل کی بقاء کو یقینی بنانا تھا۔ چند ایک ماہرین نے امریکی سرکار کے داعش کے سرغنہ کو ہلاک کرنے کے دعویٰ پر سوالیہ نشان لگاتے ہوئے کہا ہے کہ آخر ایسی کون سی قیامت آئی ہے کہ امریکہ نے گذشتہ سات برس میں تمام تر ٹیکنالوجی اور وسائل کے باوجود داعش جیسی دہشت گرد تنظیم کے سربراہ کو نشانہ نہیں بنایا۔

اسی طرح سات سال تک شام و عراق میں داعش کی جانب سے جاری خونریزی پر کوئی ایسا حملہ سامنے نہیں آیا کہ جس میں داعش کے عمومی دہشت گردوں کو بھی قتل کیا گیا ہو۔ آخر اب کس طرح امریکہ کو معلوم تھا کہ داعش کا دہشت گرد ابوبکر البغدادی ادلب کے علاقہ میں عین اسی مقام پر موجود تھا، جہاں امریکی فوج نے حملہ کیا اور اسے ہلاک بھی کر دیا۔ آخر یہ حملہ داعش کے شام و عراق میں قابض ہوتے وقت کیوں نہیں کیا گیا تھا کہ جس زمانے میں ابوبکر البغدادی جیسے دہشت گرد کھلم کھلا علاقوں میں خون کا بازار گرم کر رہے تھے۔ ماہرین کا کہنا ہے کہ امریکہ دراصل روز اول سے ہی ابوبکر البغدادی کے ساتھ رابطے میں تھا اور خطے میں انارکی اور دہشت گردی کروانے کے لئے سرگرم عمل تھا، تاہم اب بغدادی کو ہلاک کرنے کا دعویٰ کرکے امریکہ کھیل کو اپنی طرف پلٹ کر دنیا کے سامنے ہیرو بننے کی ناکام کوشش کر رہا ہے اور شاید ایک بہانہ بھی تلاش کر لیا گیا ہے، تاکہ شام سے امریکی فوج کے انخلاء کو باعزت طور پر انجام دے پائے۔ ایک اور رائے کے مطابق ماضی میں امریکی صدر نے القاعدہ کے سرغنہ اسامہ بن لادن کو پاکستان میں ایک فوجی آپریشن میں ہلاک کرنے کے اعلان کے بعد دوسرا امریکی الیکشن جیت لیا تھا۔

تاہم موجودہ امریکی صدر نے بھی اپنے پیش رو صدر کی روایت کے مطابق خود اپنے ہی پیدا کردہ دہشت گردوں کے سرغنہ ابوبکر البغدادی کو ہلاک کرنے کا دعویٰ کیا ہے، تاکہ امریکی عوام آنے والے انتخابات میں ایک مرتبہ پھر ڈونالڈ ٹرمپ کا انتخاب کرسکیں۔ خلاصہ یہ ہے کہ اقوام متحدہ کے سیکرٹری جنرل کے ترجمان نے اپنے ایک بیان میں کہا ہے کہ اس خبر کو صرف ذرائع ابلاغ سے لیا گیا ہے، جبکہ اقوام متحدہ کے پاس ایسا کوئی طریقہ کار موجود نہیں کہ اس ہلاکت کی تصدیق کی جائے۔ بہرحال امریکہ خطے میں اپنی ناکامیوں کو چھپانے اور اپنے دہشت گردانہ عزائم پر پردہ ڈالنے کے لئے چاہے اپنے بنائے ہوئے ہزاروں ابوبکر البغدادی بھی ہلاک کرنے کا دعویٰ کر لے تو امریکہ کے انسانیت مخالف جرائم کسی طرح چھپ نہیں پائیں گے۔ دنیا کی نظر میں امریکہ کل بھی لاکھوں مظلوم انسانوں کا قاتل تھا اور آج بھی امریکہ کی پوزیشن دنیا کے عوام کی نگاہوں میں ایک قاتل اور ظالم سے بڑھ کر نہیں ہے۔