سلام اے شہیدہ و مظلومہ۔۔۔۔ ماں

تحریر: ساجد علی گوندل
Sajidaligondal55@gmail.com

’’اُم ابیھا‘‘ کبھی کبھی جبر سے فرار ممکن نہیں۔ ضروری ہے کہ طبیعت کے قوانین کے سامنے سر خم کر لو اور کہو چشم۔ مجبور ہو کہ گھر کے دروازے کو گرمی، سردی، بہار و خزاں میں کھولا رکھو۔۔۔ مجبور ہو کہ موت کے سامنے ہتھیار ڈال دو اور لبیک کہو۔۔۔ مجبور ہو، اُن ناگہانی آفات کے سامنے تسلیم ہو جاو کہ جو اچانک سے آکر تمہارے گھروں کو ویران کر دیں۔۔۔۔ مجبور ہو کہ غم کو خوش آمدید کہو۔۔۔۔ اور عشق کے سامنے شانے جھکا دو اور کہو کہ۔۔۔۔ آ۔۔۔ یہ تیرا ہی گھر ہے۔۔۔ تاکہ وہ اپنی تمام خوبیوں اور تلخیوں کے ساتھ تمہارے خانہِ دل میں قدم رکھے۔۔۔۔ عشق کہ جو مہمان بن کر دل کی وادی میں قدم زن ہوتا ہے، مگر پھر تمام ہستی و وجود کا مالک۔۔۔۔۔ حتیٰ ایک دن آنکھ کھول کر دیکھا کہ وجود میں سوائے عشق کے کچھ باقی نہیں۔۔۔۔۔ آنکھوں کی غنودگی کو برطرف کرکے عینک کی گرد کو صاف کیا۔۔۔۔ پھر دیکھا تو ماں تھی۔۔۔۔ اپنے والد کی ماں۔۔۔ اپنی ماں کی ماں۔۔۔۔ اپنے جامعے کی ماں۔۔۔۔۔ اگرچہ اس نے ان کو جَنا، نہ تھا۔۔۔۔۔ مگر احساس ِ مادری اس کے چہرے سے نمایاں اور حسِ مادری نے اس کی روح کو تسخیر کر رکھا تھا۔

درد ِمادری، فقط بچہ جننے کا درد نہیں۔۔۔۔ ماں یعنی درد ِعشق کا متحمل ہونا۔۔۔۔ وہ عشق کہ جو اپنے ساتھ خنجر ِفراق بھی رکھتا ہے اور زہر ِمرگ بھی۔۔۔ جو لبوں کو سی دیتا ہے اور سر میں چاندی کی تاریں نمودار ہو جاتی ہیں۔۔۔۔۔ ماں بولو، نا۔۔۔۔ کہ تم نے کتنے ہی سکوت کے تلخ جام پیئے ہیں۔۔۔۔ اور کتنی ہی بار درد سہا۔۔۔۔۔ مگر تمہارے آبرو چشم تک خم ہوئے۔۔۔۔ اے زینت نساء۔۔۔۔ تمہارا جسم زخموں سے چور ہے۔۔۔۔ اور رسم مادری میں تمہارے لب کتنی ہی بار لبِ تیغ تک جا پہنچے۔۔۔۔۔ رسم مہربانی میں  کتنی ہی بار جلائی جا چکی ہو۔۔۔۔۔۔ تم کوئی شکوہ کیوں نہیں کرتی۔۔۔۔۔ ماں۔۔۔۔ میرے ساتھ باتیں کرو۔۔۔ وہ راز بتاو کہ جو سینہ بہ سینہ تم تک پہنچے ہیں۔۔۔۔۔ وہ درد بیان کرو جو نسل در نسل تم نے سہے ہیں۔۔۔۔۔

تم بتاو عشق کیا ہے۔۔۔ کیونکہ تم زیادہ آشنا ہو بلکہ خود مجسمہ عشق ہو۔۔۔۔۔ ان سب رازوں سے پردہ اٹھاو۔۔۔ تاکہ میں جان پاوں کہ ماں ہونا کیا ہے۔۔۔؟ کیونکہ میرے معاشرے کے بچے ابھی اس قدر بالغ نہیں ہوئے کہ شخصیت و ضرورت مادری کو پہچانیں۔۔۔۔ یہ ابھی تقلیدانہ فکر کے حامل ہیں کہ ماں یعنی وہ شمع کہ جو جل کر آب ہو جاتی ہے۔۔۔ یا وہ شعلہ کہ جو بھڑکتا ہے اور زمین بوس ہو جاتا ہے۔۔۔۔۔ یا وہ پھول کہ جو بالآخر اپنی خوشبو کھو دیتا ہے۔۔۔۔یہ ابھی تیرے جاوید و لازوال پہلو سے ناآشنا ہیں۔۔۔۔ میرے معاشرے کے فرزند ابھی بس تیری ظاہری شکل و صورت سے آشنا ہیں۔۔۔ ماں۔۔۔ درحقیقت اگر تیرا وجود نہ ہوتا تو۔۔۔ چشموں کی نغمہ خانی نہ ہوتی۔۔۔۔ صبا میں لطافت نہ ہوتی۔۔۔۔ سورج تابان نہ ہوتا۔۔۔۔ نبات میں رشد نہ ہوتی۔۔۔۔ آب میں روانی نہ ہوتی۔۔۔۔ گُلوں میں خوشبو نہ ہوتی۔۔۔۔ بلبل غزل سُرا نہ ہوتی۔۔۔۔

آدم ؑ میں روح نہ پھونکی جاتی۔۔۔۔ کشتیِ نوح ؑساحل تک نہ آتی۔۔۔۔ آتشِ ابراہیم ؑ خاموش نہ ہوتی۔۔۔۔ موسیٰؑ کو نیل میں رستہ نہ ملتا۔۔۔۔ یوسفؑ کو کنویں سے نجات نہ ملتی۔۔۔۔ گلِ مریمؑ میں مہک نہ ہوتی۔۔۔۔ نسیمِ عیسیٰؑ مردوں کو زندہ نہ کرتی اور باغ گل محمدیؑ، انفاس عالم کو معطر نہ کرتا۔۔۔۔۔۔ ماں اگر تو نہ ہوتی تو۔۔۔۔ تربت کربلا کو شفا نہ ملتی۔۔۔۔ حسنؑ کو سخاوت و وقار۔۔۔۔ حسینؑ کو صبر و  قرار۔۔۔۔ سجادؑ کو صحیفہ ِ راز۔۔۔۔ باقرؑ کو علم۔۔۔۔ صادقؑ کو صداقت۔۔۔۔ کاظمؑ کو اجابت۔۔۔۔ رضاؑ کو رضایت۔۔۔۔ تقی ؑ کو  تقاوت۔۔۔۔ نقی ؑ کو نزاکت۔۔۔۔ عسگری کو عسگر اور مہدی ؑکا قیام نہ ہوتا۔۔۔ بلکہ وجود منجی بشریت نہ ہوتا۔۔۔ اگر مہدیؑ  نہ ہوتا تو عالم میں حرکت نہ ہوتی۔۔۔۔ یعقوبؑ کی آنکھیں انتظار یوسف ؑ میں رہتیں اور کبھی بینا نہ ہوتی۔۔۔۔ شیرازہ خلقت بکھر جاتا۔۔۔۔ نبضِ زمان پھٹ جاتی۔۔۔۔ زمین اپنے اہل کو نگل جاتی اور وعدہ خدا کبھی محقق نہ ہوتا۔۔۔۔۔۔

اے ماں یہ سب تیرے وجود کی برکت ہے۔۔۔۔ مگر ہم شرمندہ ہیں کہ زمانے نے تیرے نام کی حرمت کو پامال کیا۔۔۔۔ تُو بحر قرآنی ہے کہ جس نے جامعہِ بشری کو موتیوں سے نوازا۔۔۔۔ مگر تعجب ہے فریبِ روزگار پر کہ کائنات نے حق ِمادری کے عوض، تجھ پر تازیانے برسائے۔۔۔۔ تیرے ارمانوں کو روندا۔۔۔۔ مگر کبھی سنا ہے کہ بیٹوں نے ماں کا گھر جلایا ہو۔۔۔۔ کیا شفقت ِمادری کا صلہ طمانچوں سے ادا کیا جاتا ہے۔۔۔۔ افسوس صد افسوس، غلبہ خواہشات پر کہ جس نے بیٹوں کے ہاتھوں ماں کو اس قدر مجبور کر دیا کہ کہا۔۔۔۔۔ میرا جنازہ تب  اٹھنا ’’اذا ھدات العیون و نامت الابصار‘‘ کہ جب آنکھیں آرام میں اور لوگ خواب غفلت میں ہوں۔۔۔۔۔

بے شک انہوں نے حرمتِ مادری کو پامال کیا ہے۔۔۔۔ ماں کی شفقت کا گلہ گھونٹا ہے۔۔۔۔ فضا اس قدر آلودہ کی کہ ماں کی محبت دم توڑنے لگی۔۔۔۔ سانس لینا مشکل ہوگیا۔۔۔۔ اس قدر ستم سے کام لیا، قریب تھا کہ دن کی سفیدی رات کی تاریکی میں بدل جائے۔۔۔۔ آج بھی اس ماں کی مظلومانہ صدائیں مدینے کی گلیوں سے ٹکرا رہی ہیں۔۔۔۔ اور عالم انسانیت کے دامن میں ہاتھ ڈال کر  وہ ماں صرف ایک ہی سوال کا جواب چاہتی ہے کہ۔۔۔۔ کیا اس کی الفت و محبت کا بدلہ بس یہی چند پتھر ہیں۔۔۔۔۔۔۔؟