اسلام ٹائمز - آذربائیجان کے بارے میں ایران کا موقف

آذربائیجان نے جنگ کے بارے میں رہبر انقلاب اسلامی حضرت آیت اللہ سید علی خامنہ ای کے موقف کی قدردانی کی ہے لیکن اس میں کوئی شک و شبہ نہیں کہ جب تک اس مسئلے میں امریکہ سمیت دیگر مغربی طاقتیں شریک رہیں گی، مسئلہ خطے کے مفاد میں حل نہیں ہوگا۔

اداریہ
رہبر انقلاب اسلامی حضرت آیت اللہ سید علی خامنہ ای نے سترہ ربیع الاول کے خطاب میں جہاں اسلامی وحدت، امریکی زوال، فرانس کے صدر کے متعصبانہ بیان اور فلسطین کے حوالے سے حکیمانہ خطاب فرمایا ہے، وہاں انہوں نے آذربائیجان اور آرمینیا جنگ کے حوالے سے اسلامی جمہوریہ ایران کے موقف کو کھل کر بیان فرمایا ہے۔ رہبر انقلاب اسلامی کے خطاب سے پہلے ایران پر مختلف طرح کے الزامات عائد کیے جا رہے تھے اور یہاں تک پراپیگنڈہ کیا جاتا تھا کہ ایران ایک مسلمان ملک آذربائیجان کے خلاف ایک غیر مسلم ملک آرمینیا کو ہتھیار فراہم کر رہا ہے۔

رہبر انقلاب اسلامی نے اس جنگ کے حوالے سے ایران کا موقف بیان کرتے ہوئے فرمایا ہے کہ آذربائیجان اور آرمینیا کے درمیان جنگ جتنی جلدی ممکن ہو ختم ہو جانی چاہیئے، لیکن آذربائیجان کے تمام مقبوضہ علاقے آذربائیجان کو واپس ملنے چاہیئں اور آرمینیا کو ان علاقوں کو ترک کر دینا چاہیئے۔ رہبر انقلاب اسلامی نے ایران کی سرحدوں پر جاری جنگ اور اس کے اثرات کے بارے میں گفتگو کرتے ہوئے فرمایا ہے کہ مصدقہ اطلاعات کے مطابق دہشت گرد اس علاقے میں داخل ہوچکے ہیں، وہ ایرانی سرحدوں کے قریب نہ آئیں اور اگر وہ ایرانی سرحدوں کے قریب آئے تو ان سے قاطعانہ سلوک کیا جائیگا۔ آرمینیا اور آذربائیجان کے درمیان جنگ اور اختلاف ایک پرانا زخم ہے اور اس زخم کا علاج ہونا چاہیئے۔

رہبر انقلاب اسلامی کے حالیہ بیان اور اس سے پہلے ایران کی وزارت خارجہ نے اس مسئلے کے حل کے لیے متعدد اقدامات انجام دیئے ہیں۔ وزیر خارجہ جواد ظریف اور نائب وزیر خارجہ سید عباس عراقچی کے متعدد دورے اسی کام کی انجام دہی کیلئے انجام دیئے گئے ہیں۔ آذربائیجان کے اعلیٰ سفارتی حلقوں نے اس جنگ کے بارے میں رہبر انقلاب اسلامی حضرت آیت اللہ سید علی خامنہ ای کے موقف کی قدردانی کی ہے، لیکن اس میں کوئی شک و شبہ نہیں کہ جب تک اس مسئلے میں امریکہ سمیت دیگر مغربی طاقتیں شریک رہیں گی، مسئلہ خطے کے مفاد میں حل نہیں ہوگا۔ آذربائیجان اور آرمینیا کو علاقائی ممالک کے ساتھ مل کر اس مسئلے کے پائیدار حل کے لیے کوششیں کرنا ہونگی۔