اسلام ٹائمز - بِأَيِّ ذَنْبٍ قُتِلَتْ

یمن کی وزارت صحت نے عالمی یوم اطفال کی مناسبت سے سنیچر کو ایک رپورٹ میں اعلان کیا ہے کہ مارچ دو ہزار پندرہ سے اب تک سعودی جارحیت میں دو ہزار چھے سو تینتالیس یمنی بچے شہید اور چار ہزار دو سو پچاس سے زیادہ زخمی ہوئے ہیں۔

اداریہ
جارح سعودی اتحاد نے ایندھن اور پٹرولیم مصنوعات کے حامل پندرہ بحری جہازوں کو روک رکھا ہے اور وہ اس مال کو یمن کی الحدیدہ بندرگاہ پر اتارنے کی اجازت نہیں دے رہا ہے۔ سعودی دشمن کا مقصد یمن کے مسائل و مشکلات میں مزید اضافہ کرکے یمنی عوام پر تسلیم ہونے کے لئے دباؤ ڈالنا ہے۔ حالانکہ اقوام متحدہ کے سیکرٹری جنرل آنٹونیو گوٹرش جمعے کو یمن کے حالات کے بارے میں سلامتی کونسل کے اجلاس میں اعلان کرچکے ہیں کہ یمن کو دنیا میں ایسی بدترین بھوک مری کا سامنا ہے، جس کی حالیہ چند دہائیوں میں دنیا میں کوئی مثال نہیں ملتی۔ انہوں نے کہا کہ یمن کے بحران میں شدت آنے کی وجہ امداد میں کمی ہے۔

اقوام متحدہ کے سیکرٹری جنرل نے کہا کہ یمن کے حالات مزید خراب ہونے کا ایک سبب جنگ کا جاری رہنا اور اس ملک کے عوام کے لئے امداد رسانی کو روکنا بھی ہے۔ یمن کی اعلیٰ سیاسی کونسل کے رکن اور انقلابی کمیٹی کے چیئرمین محمد علی الحوثی نے یمن میں بھوک مری کے بحران اور اس ملک کے عوام کے لئے امداد رسانی کے فقدان کے تعلق سے اقوام متحدہ کے سیکرٹری جنرل آنٹونیو گوٹرش کے بیان کا خیرمقدم کیا ہے۔ انہوں نے کہا ہے کہ یمن کو دنیا کی بدترین بھوک مری کا سامنا ہے اور اس ملک میں بحران میں شدت پیدا ہونے کی وجہ امداد میں سخت کمی اور اس ملک کے اقتصاد کی بیرونی حمایت میں ناکامی رہی ہے۔