اسلام ٹائمز - افغانستان سے امریکی افواج کا جزوی انخلا

ایک اہم نکتہ یہ ہے کہ ٹرامپ کے اس فیصلے پر نیٹو بھی راضی نہیں ہے، کیونکہ ٹرامپ سے نیٹو فورسز کے اعلیٰ حکام کا کسی قسم کی ہم آہنگی کے بغیر امریکی فوجیوں کے انخلا پر راضی ہونا خلاف حقیقت نظر آرہا ہے۔

اداریہ
امریکی وزارت جنگ کے قائم مقام سربراہ کرسٹوفر ملر نے کہا ہے کہ امریکی صدر ڈونالڈ ٹرامپ کے حکم پر افغانستان سے امریکی فوجیوں کا انخلا شروع ہو رہا ہے اور اب افغانستان میں صرف 2500 امریکی فوجی تعینات رہیں گے۔ امریکی صدر کے اس فیصلے پر مختلف طرح کے تبصرے آرہے ہیں۔ سب سے اہم اور فوری تبصرہ یہ ہے کہ جو امریکی صدر افغانستان سے امریکی فوجیوں کے انخلا کا حکم صادر کر رہے ہیں، وہ خود 20 جنوری کو وائٹ ہاوس سے نکالے جا رہے ہیں۔ ان کے خلاف مواخذہ کی تحریک بلکہ ننسی پلوسی کے بقول فرد جرم عائد کر دی گئی ہے اور بعید نہیں کہ اس فرد جرم کے نتیجے میں ڈونالڈ ٹرامپ کو جیل کی ہوا بھی کھانا پڑے۔ دوسری اہم بات یہ ہے کہ ڈونالڈ ٹرامپ کے اس فیصلے پر ٹرامپ کی سیاسی ٹیم اور پینٹاگان میں واضح اختلاف تھا۔

اب دیکھنا یہ ہے کہ نئے امریکی صدر جوبائیڈن پینٹاگان کی بات مان کر دوبارہ افغانستان میں اپنی موجودگی کو بڑھا دیتے ہیں یا نہیں۔ ایک اہم نکتہ یہ ہے کہ ٹرامپ کے اس فیصلے پر نیٹو بھی راضی نہیں ہے، کیونکہ ٹرامپ سے نیٹو فورسز کے اعلیٰ حکام کا کسی قسم کی ہم آہنگی کے بغیر امریکی فوجیوں کے انخلا پر راضی ہونا خلاف حقیقت نظر آرہا ہے، کیونکہ افغانستان ایک بار پھر بری طرح سکیورٹی کے مسائل سے دوچار ہے۔ البتہ طالبان گروہ اس انخلا پر یقیناً خوش ہونگے، کیونکہ اب انہیں افغانستان میں مزید کھل کر کھیلنے کا موقع ملے گا۔ طالبان نے افغانستان میں اقتدار میں آنے کے لیے تشدد اور مذاکرات کا دو رخا انداز اپنا رکھا ہے اور اس اسٹریٹیجی کی کامیابی کے لیے امریکی فورسز کا کم سے کم ہونا سودمند ہے۔