اسلام ٹائمز۔ ملک بھر کی طرح بلوچستان کے دارالحکومت کوئٹہ میں بھی چہلم شہدائے کربلاء کی مناسبت پر جلوس اربعین برآمد ہوا۔ جلوس میں عزاداروں کی بڑی تعداد نے ماتمداری اور نوحہ خوانی کرتے ہوئے شہدائے کربلاء کو پرسہ دیا۔ بلوچستان شیعہ کانفرنس کے صدر حاجی محمد جواد رفیعی اور مجلس وحدت مسلمین کے مرکزی رہنماء و سابق وزیر قانون آغا رضا بھی جلوس میں پیش پیش نظر آئے۔ اس موقع پر سکیورٹی کے سخت انتظامات کئے گئے تھے۔ ڈی آئی جی کوئٹہ غلام اظفر مہیسر، ایس ایس پی آپریشنز عبدالحق عمرانی، ڈپٹی کمشنر کوئٹہ شہک بلوچ، بلوچستان شیعہ کانفرنس کے صدر حاجی محمد جواد رفیعی اور دیگر منتظمین نے سکیورٹی کا جائزہ لیا۔ اربعین کے موقع پر مسجد خاتم الانبیاء کی جانب سے علمدار روڈ کے مرکزی جلوس کیلئے نماز باجماعت اور مجلس عزاء کا بھی انعقاد کیا گیا۔ اسکے علاوہ مختلف سماجی تنظیموں اور اسکاؤٹس کی جانب سے بلڈ ڈونیشن کیمپس اور طبی کیمپس بھی لگائے گئے تھے۔
