اسلام ٹائمز - تقریب رونمائی ’تاریخ شیعیان جموں و کشمیر‘

نمائندہ ولی فقیہ بھارت آقای مہدی مہدوی پور کے ہاتھوں ’تاریخ شیعیان جموں و کشمیر‘ کتاب کی رسم رونمائی، دانشوروں اور علماء کرام سے بھی ملاقات کی۔

اسلام ٹائمز۔ بھارت میں مقیم نمائندہ ولی فقیہ آقای مہدی مہدوی پور نے کشمیر دورہ کے دوران شیعہ و سنی مکتب ہائے فکر سے وابسطہ نامور علماء کرام، دانشور حضرات، مفکرین ملت، دینی جماعتوں کے نمائندوں اور عام لوگوں سے الگ الگ ملاقاتیں کیں اور معاشرے میں پنپ رہی سماجی بدعات کے خاتمے پرزور دیا۔ آقای مہدوی پور نے وادی کے معروف قانون دان، مفکر اور مصنف سابق جسٹس حکیم امتیاز حسین کی تصنیف تاریخ شیعیان کشمیر کے پہلے جلد کی رسم رونمائی کی۔ محکمہ اطلاعات کے پنڈت بھجن سوپوری آڈیٹوریم میں تاریخ شیعیان کشمیر کے پہلے جلد کی رسم رونمائی کے تقریب میں آقای مہدوی پور نے کہا کہ اللہ نے مجھے ایک مرتبہ پھر توفیق دی کہ میں نے سر زمین کشمیر جو سر زمین علم و معرفت، سر زمین شعر و ادب، سر زمین شریعت و طریقت، سر زمین عارفان بزرگ، سر زمین مفکرین اور شاعروں و عظیم ادباء کی سر زمین ہے پر قدم رکھا۔ انہوں نے جسٹس حکیم امتیاز حسین کی کاوشوں کی قدردانی کرتے ہوئے کہا کہ حکیم امتیاز ایک بلند پایہ مفکر ہے جس نے تاریخ شیعیان کشمیر تحریر کرکے ایک قابل فخر اور قابل داد کارنامہ انجام دیا۔ انہوں نے جسٹس حکیم امتیاز حسین کو مبارکباد پیش کرتے ہوئے انہیں شکریہ ادا کیا۔

آقای مہدی مہدوی پور نے رسم رونمائی کی تقریب میں مشہور و معروف عالم دین ڈاکٹر سمیر صدیقی، قد آور صحافی یوسف جمیل اور کشمیری ادب کے مایہ ناز شاعر، ادیب اور نقاد ڈاکٹر شاد رمضان کے علاوہ شیعہ و سنی مکتب ہائے فکر سے تعلق رکھنے والے درجنوں علماء کرام، دانشوروں اور صحافیوں سے ملاقاتیں کیں۔ آقای مہدی مہدوی پور نے وادی کشمیر کے نامور عالم دین اور سابق حریت چیئرمین مولانا محمد عباس انصاری کے گھر جاکر ان سے عیادت کی۔ انہوں نے مولانا انصاری کی صحتیابی کے لئے دعا کی۔ آقای مہدوی پور نے معاشرے میں پنپ رہی سماجی بدعات کے خاتمے پر زور دیتے ہوئے کہا کہ کشمیر کی سر زمین علم و معرفت، شعر و ادب اور عرفاء و اولیاء کی سر زمین ہے اس کو سماجی بدعات سے پاک و صاف رکھنے میں سماج کے ہر طبقے کو چاہیئے کہ وہ اپنا کردار ادا کرے۔ آقای مہدی مہدوی پور کے ساتھ آغا سید تقی رضوی بھی تھے۔