اسلام ٹائمز۔ مجلس وحدت مسلمین ضلع بھکر کے سیکرٹری جنرل سفیر حسین شہانی نے دیگر رہنماوں کے ہمراہ ضلع کے مختلف مقامات کے دورہ جات کئے اور تنظیم سازی کی گئی۔ نہری والہ کے دورہ کے دوران علاقہ عوام کیساتھ ایک خصوصی نشست کا اہتمام کیا گیا۔ جہاں سفیر حسین شہانی نے مجلس وحدت مسلمین کے حوالے سے شرکاء کو آگاہ کیا اور ملٹی میڈیا کے ذریعے تربیتی لیکچر دکھایا گیا۔ جبکہ ایم ڈبلیو ایم کی ضلعی کابینہ نے رکھیاں والہ کا دورہ کیا۔ اس موقع پر شہدائے کوئٹہ کے بلندی درجات کیلئے قرآن خوانی کا اہتمام کیا گیا۔ مقررین نے خطاب کرتے ہوئے شہداء کی قربانی کو اجاگر کیا۔ آخر میں رکھیاں والہ یونٹ کا قیام بھی عمل میں لایا گیا۔ وادھی والہ کے دورہ کے موقع پر ایم ڈبلیو ایم کے ضلعی رہنماوں نے شرکاء کی بڑی تعداد سے خطاب کیا۔ اس موقع پر وادھی والہ یونٹ کی تشکیل کی گئی۔ اور محب عباس کو یونٹ سیکرٹری جنرل منتخب کیا گیا۔
