اسلام ٹائمز - علماء ملاقات

اسلام ٹائمز: علامہ شفقت شیرازی کا کہنا تھا کہ ہم آپ کو دعوت دیتے ہیں کہ ملت کی وحدت بچانے کیلئے آئیں اور ایک مشترکہ پریس کانفرنس میں شیعہ اُمیدوار کی حمایت کرکے ملت کی اُمنگوں کی ترجمانی کریں۔

اسلام ٹائمز۔ شیعہ علماء کونسل پاکستان پنجاب کے صوبائی صدر علامہ مظہر عباس علوی نے مقامی علماء کے ہمراہ مجلس وحدت مسلمین پاکستان کے خارجہ اُمور کے سربراہ علامہ شفقت شیرازی سے پبلک سیکرٹریٹ جھنگ میں ملاقات کی۔ اس موقع پر جھنگ کے مقامی عمائدین اور شیعہ علماء کونسل کے ضلعی رہنما حسن شاہ بھی موجود تھے۔ ملاقات میں علامہ شفقت شیرازی نے کہا کہ جھنگ کی طرح جن دیگر علاقوں میں شیعہ علماء کونسل کی جانب سے تکفیریوں اور تکفیریوں کے حمایت یافتہ اُمیدواروں کی حمایت کی جا رہی ہے اور ہمارے شیعہ اُمیدواروں کی کھلم کھلا مخالفت کی جا رہی ہے، خدارا قوم تشیع کی بقاء اور مضبوطی کے لیے شیعہ اُمیدواروں کی اگر حمایت نہیں کرسکتے تو کم از کم مخالفت بھی نہ کی جائے۔ ہم آپ کو دعوت دیتے ہیں کہ ملت کی وحدت بچانے کے لیے آئیں اور ایک مشترکہ پریس کانفرنس میں شیعہ اُمیدوار کی حمایت کرکے ملت کی اُمنگوں کی ترجمانی کریں۔