اسلام ٹائمز۔ رہبر معظم اسلامی، رہبر مسلمین و مستضعفین جہاں سید علی خامنہ ای کی حکم پر لبیک کہتے ہوئے دنیا بھر کی طرح بلتستان میں بھی یوم القدس نہایت تزک و احتشام کے ساتھ منایا گیا۔ اس سلسلے میں بلتستان میں امامیہ اسٹوڈنٹس آرگنائزیشن پاکستان بلتستان ڈویژن روندو یونٹ کے زیراہتمام روندو میں مختلف مقامات پر القدس ریلیاں برآمد ہوئیں، آئی ایس او شگر یونٹ کے زیراہتمام بھی قبلہ اول پر یہودی قبضہ کے خلاف صدائے احتجاج بلند کی گئی، کھرمنگ خاص اور مہدی آباد میں بھی آئی ایس او کے زیراہتمام غاصب اسرائیل کے ظلم و بربریت کے خلاف لوگ سڑکوں پہ نکل آئے، اسی طرح ضلع گنگچھے میں آئی ایس او خپلو یونٹ نے فقید المثال قدس ریلی کا اہتمام کیا گیا، جس میں مختلف مکاتب فکر کے علمائے کرام اور عوام کی بڑی تعداد نے شرکت کی، اسی طرح آئی ایس او گمبہ یونٹ نے خانقاہ گمبہ اسکردو سے مالک اشتر چوک تک القدس ریلی نکالی، جبکہ بلتستان میں مرکزی القدس ریلی انجمن امامیہ بلتستان کے زیراہتمام مرکزی امامیہ جامع مسجد اسکردو سے یادگار شہداء اسکردو تک نکالی گئی۔ ریلی میں ہزاروں مظاہرین شریک تھے۔ مرکزی القدس ریلی میں مجلس وحدت مسلمین پاکستان بلتستان ڈویژن، امامیہ اسٹوڈنٹس آرگنائزیشن پاکستان بلتستان ڈویژن، شیعہ علماء کونسل بلتستان، جعفریہ اسٹوڈنٹس آرگنائزیشن اور امامیہ آرگنائزیشن نے بھرپور شرکت کی، جبکہ نظامت کی ذمہ داری انجمن امامیہ کے پاس تھی۔

اسلام ٹائمز