اسلام ٹائمز۔ یوم القدس کے موقع پر مختلف تنظیموں کی جانب سے ڈیرہ اسماعیل خان میں آزادی القدس ریلیاں نکالی گئیں۔ کوٹلی امام حسین میں شیعہ علماء کونسل، امامیہ اسٹوڈنٹس آگنائزیشن اور جعفریہ اسٹوڈنٹس آرگنائزیشن کے زیر اہتمام مشترکہ ریلی نکالی گئی، ریلی کی قیادت شیعہ علماء کونسل خیبر پختونخوا کے صدر علامہ محمد رمضان توقیر نے کی۔ شرکائے ریلی نے ’’امریکہ مردہ باد اور اسرائیل مردہ باد‘‘ کے نعرے بلند کئے۔ علاوہ ازیں ڈیرہ اسماعیل خان کی تحصیل پہاڑ پور میں مجلس وحدت مسلمین، شیعہ علماء کونسل، امامیہ اسٹوڈنٹس آرگنائزیشن، پیام ولایت فاونڈیشن اور تحریک بیداری امت مصطفیٰ (ص) کے زیر اہتمام مشترکہ احتجاجی ریلی نکالی گئی۔ ریلی کے شرکاء نے ہاتھوں میں پلے کارڈز اور بینرز اٹھا رکھے تھے جن پر امریکہ اور اسرائیل کیخلاف اور بیت المقدس کی آزادی کے حوالے سے نعرے درج تھے۔ اس موقع پر ریلی کے شرکاء نے امریکی اور اسرائیلی جھنڈے بھی نذر آتش کئے۔
