اسلام ٹائمز۔ جشنِ عید میلادالنبی صلی اللہ علیہ وآلہ وسلم کے سلسلہ میں مرکزی میلاد کمیٹی کے زیراہتمام ریلوے اسٹیشن سے داتا دربار تک لاہور کا سب سے بڑا جلوس نکالا گیا۔ جلوس میں علماء و مشائخ، دینی مدارس کے ناظمین اور اہلسنت تنظیموں، وکلاء، طلباء، تاجر اور سول سوسائٹی کے نمائندوں کے علاوہ لاہور کے گردونواح سے سینکڑوں عاشقانِ مصطفٰی صلی اللہ علیہ و آلہ وسلم نے کثیر تعداد میں شرکت کی۔ تمام راستے میں قصیدہ بردہ شریف، درود و سلام کا ورد کیا گیا اور سرکار صلی اللہ علیہ وآلہ وسلم کی آمد مرحبا، مرحبا، پتی پتی پھول پھول یارسول (ص)، جشنِ عید میلاد النبی (ص) مبارکباد کے نعروں سے فضاء گونجتی رہی۔ عاشقانِ مصطفٰی صلی اللہ علیہ وآلہ وسلم مسلسل نعرے لگاتے رہے۔
