خانہ فرہنگ

اسلام ٹائمز۔ خانہ فرہنگ کوئٹہ کے زیراہتمام "ماہ مبارک رمضان دنیا بھر کے مسلمانوں کے درمیان اتحاد و وحدت کی علامت" کے موضوع پر ایک سیمینار منعقد ہوا۔ سیمینار سے خطاب کرتے ہوئے مجلس وحدت مسلمین بلوچستان کے سربراہ علامہ مقصود علی ڈومکی نے کہا کہ ماہ مبارک رمضان شہر اللہ یعنی اللہ کا مہینہ، نزول قرآن کریم کا مہینہ، امت مسلمہ کے درمیان وحدت و اتحاد کی علامت ہے، جس میں دنیا بھر کے مسلمان رنگ، نسل اور فرقوں کی تفریق سے بالا تر ہوکر خدائے واحد کی اطاعت بجا لاتے ہوئے روزہ رکھتے ہیں۔ دنیا میں کروڑوں مسلمانوں کے درمیان یہ یکجہتی اور ہم آہنگی کی لازوال مثال ہے۔ انبیاء (ع) کی سرزمین فلسطین پر اسرئیلی جارحیت پر اقوام متحدہ اور حقوق انسانی کے عالمی اداروں کی خاموشی قابل مذمت ہے۔ ہم مظلوم فلسطینی عوام کو یقین دلاتے ہیں کہ آپ ہمارے دلوں میں بستے ہیں۔ ہم آپ کے ساتھ ہیں اور آپ کی مظلومیت پر ہم سوگوار ہیں۔ انشاءاللہ نصرت الہی کا وعدہ جلد سچا ہوگا اور امت مسلمہ کی وحدت، بیداری اور قیام للہ کے نتیجہ میں قبلہ اول جلد آزاد ہوگا۔ سیمینار سے خطاب کرتے ہوئے امیر جماعت اسلامی بلوچستان عبدالمتین آخونزادہ نے کہا کہ مسجد اقصٰی اور قبلہ اول کی بابرکت سرزمین پر اسرئیل کا غاصبانہ قبضہ، اور سرزمین انبیاء (ع) پر حالیہ اسرائیلی جارحیت کی شدید الفاظ میں مذمت کرتے ہیں۔ ایران کے اسلامی نظام حکومت کو مسلکی اختلاف کے باوجود ہم اپنے لئے آئیڈیل سمجھتے ہیں۔ جمعیت اتحاد العلماء کے ڈاکٹر عطاء الرحمن نے کہا کہ آج ہم یہ عہد کرتے ہیں کہ ہم قرآن کریم کے فرمان انما المومنون اخوہ سے ہدایت لیتے ہوئے اتحاد بین المسلمین کے ذریعے تفرقہ اور انتشار کی ہر سامراجی سازش کو ناکام بنا دیں گے۔ سیمینارسے خطاب کرتے ہوئے ایرانی کونسل جنرل آقائے سید حسن یحیوی نے کہا کہ اس وقت عالم اسلام دہشت گردی کا شکار ہے، جہاں مسجدیں اور نمازی تک محفوظ نہیں۔ ہم دہشت گردی کی مذمت کرتے ہوئے معاشرے کے باشعور طبقات سے اپیل کرتے ہیں کہ وہ قیام امن و فروغ اتحاد میں اپنا کردار ادا کریں۔ سیمینار سے معروف دانشور امان اللہ شادیزئی اور ڈائریکٹر خانہ فرہنگ سید ابوالفضل حسینی نے بھی خطاب کیا۔