اسلام ٹائمز - پی ڈی اے اجلاس

اسلام ٹائمز: ڈی آئی خان میں پاکستان ڈاکٹرز ایسوسی ایشن کا جنرل باڈی اجلاس ہوا، جس میں خیبرپختونخوا حکومت کی جانب سے ڈاکٹرز کی پرائیویٹ پریکٹس پر پابندی کی مذمت کی گئی، اور اس فیصلے کو تسلیم کرنے سے انکار کیا گیا، صدر پی ڈی اے کا کہنا تھا کہ تمام ڈاکٹرز صوبائی حکومت کے فیصلے کے خلاف شانے سے شانہ ملائے کھڑے ہیں۔

اسلام ٹائمز۔ پاکستان ڈاکٹرز ایسوسی ایشن کے صدر ڈاکٹر فاروق گل نے کہا ہے کہ سپریم کورٹ کی جانب سے دی گئی رولنگ میں ڈاکٹرز صبح 8 بجے سرکاری ہسپتالوں میں حاضریاں لگانے کے پابند نہیں ہیں۔ ان خیالات کا اظہار انہوں نے ڈیرہ اسماعیل خان ڈسٹرکٹ ہیڈ کوارٹر ہسپتال میں پاکستان ڈاکٹرز ایسوسی ایشن کے جنرل باڈی اجلاس سے خطاب کرتے ہوئے کیا۔ اجلاس میں ڈاکٹرز کی کثیر تعداد نے شرکت کی۔ ڈاکٹر فاروق گل کا کہنا تھا کہ ہم صوبائی حکومت کی جانب سے کئے گئے فیصلوں کیخلاف صوبائی پی ڈی اے تنظیم کے احتجاج کی مکمل حمایت کا اعلان کرتے ہیں، اور تمام ڈاکٹرز اپنے حقوق کے حصول کیلئے شانے سے شانہ ملائے کھڑے ہیں۔ انہوں نے کہا ہے کہ پرائیویٹ پریکٹس پر پابندی کسی صورت قابل قبول نہیں ہے۔ ڈاکٹروں نے کہا کہ سپریم کورٹ کی رولنگ کی روشنی میں ہم ہسپتالوں میں صبح ۸ بجے حاضریاں لگانے کے پابند نہیں ہیں۔ ڈاکٹروں کا کہنا تھا کہ صوبائی حکومت ہمیں حاضریوں کا پابند بنانے کی بجائے دیگر محکموں کے افسران سمیت سیکرٹریٹ ملازمین کو پابند بنائے۔