اسلام ٹائمز۔ امامیہ اسٹوڈنٹس آرگنائزیش پاکستان کراچی ڈویژن شعبہ محبین کی جانب سے سانحہ پشاور کے خلاف کراچی پریس کلب پر احتجاجی مظاہرہ کیا گیا، جس میں شہر کے محتلف اسکولوں اور کالجزکے طلباء و طالبات نے بڑی تعداد میں شرکت کی اور شہدائے پشاور سے تجدید عہد کیا۔اس موقع پر رکن مرکزی نظارت آئی ایس او پاکستان علامہ احمد اقبال رضوی نے کہا کہ سانحہ پشاور قومی سانحہ ہے ، قومی اداروں پر یہ ذمہ داری عائد ہوتی ہے کہ سانحہ پشاور میں ملوث دہشتگرد عناصر کو قوم کے سامنے بے نقاب کریں۔ انہوں نے کہا کہ دہشتگرد وں کے ساتھ ساتھ انکے سیاسی و مذہبی حامیوں کے خلاف بھی عملی کاروائی کی جائے۔علامہ احمد اقبال نے مزید کہا کہ معصوم بچوں کو نشانہ بنانے والے درندے ہیں، ان سے رعایت کا مطلب عوام اور بچوں کو دہشتگردوں کے رحم و کرم پر چھوڑنے کے مترادف ہے۔

 

اسلام ٹائمز