کوئٹہ، ساتویں اجتماعی شادیوں کا انعقاد

اسلام ٹائمز۔ مجلس وحدت مسلمین کوئٹہ ڈویژن کے زیراہتمام "ساتویں اجتماعی شادیوں" کا انعقاد کیا گیا۔ اجتماعی شادیوں میں 16 جوڑوں نے حصہ لیا، جن میں 7 جوڑے اہلسنت برادران کے تھے۔ اس پُروقار تقریب میں میئر کوئٹہ ڈاکٹر کلیم اللہ، ڈپٹی میئر یونس بلوچ، خطیب مسجد سفیر قاری عبدالرحمن، سابق ڈی آئی جی فقیر حسین، میجر (ر) نادر علی، صدر شیعہ کانفرنس سید داود آغا، ایم ڈبلیو ایم کے رکن بلوچستان اسمبلی سید محمد رضا اور امام جمعہ کوئٹہ علامہ سید ہاشم موسوی سمیت دیگر معزز مہمانوں کی کثیر تعداد نے شرکت کی۔ پروگرام کا آغاز تلاوت قرآن پاک سے ہوا۔ بعدازاں منقبت خوانوں نے منقبت پڑھی۔ شرکاء سے خطاب کرتے ہوئے خطیب سفیر مسجد قاری عبدالرحمن نے کہا کہ کوئی شک نہیں کہ مجلس وحدت مسلمین، پاکستان بھر میں اتحاد بین المسلمین کے فروغ کیلئے احسن خدمات سرانجام دے رہی ہے، یہاں نہ صرف اہل تشیع بلکہ اہل سنت برادران کے بھی جوڑے بیٹھے ہیں، جو اپنی مثال آپ ہے۔ مجلس وحدت مسلمین پاکستان کے مرکزی رہنما علامہ سید ہاشم موسوی نے اپنے خطاب میں کہا کہ الحمدللہ چھ کامیاب اجتماعی شادیوں کے پروگرام کے بعد آج رات ساتویں اجتماعی شادیوں کا پروگرام انعقاد کرنے کی توفیق اللہ نے بخشی۔ اس تقریب کا مقصد معاشرے میں فضول رسم رواج کو ختم کرنا ہے۔ لوگ اکثر شادیوں پر کثیر رقم خرچ کرتے ہیں جو کہ جائز نہیں۔ تقریب شادی کو آسان بنانا چاہیے تاکہ معاشرے سے بے راہ روی ختم ہوسکے۔ جسکے لئے ہماری تنطیم عملی کوششیں کر رہی ہے۔ میئر کوئٹہ ڈاکٹر کلیم اللہ نے شرکاء سے خطاب کرتے ہوئے کہا کہ ایم ڈبلیو ایم کی کاوشوں کو سلام پیش کرتا ہوں کہ انہوں نے ایک گل دستہ بنایا ہے۔ جس میں معاشرے کے تمام طبقات کو شامل کیا گیا۔ میری خواہش ہے کہ اپنے دور حکومت میں کوئٹہ میں ایک بڑا شادی ہال بناوں۔ جن میں ہر مہینے لوگ اجتماعی شادیوں میں شریک ہوسکیں، کیونکہ سرکاری ملازم یا میٹرک، ایف اے پاس غریب بچوں کی اتنی استطاعت نہیں کہ اس مہنگائی کے دور میں اپنے گھر کو چلا سکیں۔ چے جائیکہ اپنے شادی کے لئے رقم جمع کرسکیں۔ یقیناً معاشرے کی فضول رسم و رواج کیوجہ سے رقم ادھار میں لے کر نوجوان اپنی شادی کرتے ہیں۔ ڈپٹی میئر یونس بلوچ نے شرکاء سے خطاب کرتے ہوئے کہا کہ آج تک میں نے ایسی پروقار تقریب کہیں نہیں دیکھی، جس میں ہر رنگ و نسل اور مذہب کے لوگ تشریف فرما ہوں، یہاں صرف شیعہ نہیں بلکہ سنی بھی اجتماعی شادیوں میں شرکت کر رہے ہیں، جو کہ ایک خوش آئند بات ہے۔ تقریب کے آخر میں ممبر بلوچستان اسمبلی آغا رضا نے تمام آنے والے مہمانوں کو خوش آمدید کہا اور آئندہ بجٹ میں اپنے فنڈز سے دس لاکھ روپے آٹھویں اجتماعی شادیوں کے لئے مختص کرنے کا اعلان کیا۔