اسلام ٹائمز - ایف سی بھرتی، امیدواروں کا احتجاج

اسلام ٹائمز: ایف سی بلوچستان کی بھرتی کیلئے آنیوالے امیدوار اس وقت مشتعل ہوگئے، جب انتظامیہ کی جانب سے اعلان کیا گیا کہ میٹرک کے علاوہ ایف اے تعلییم والے بھی کاغذات جمع کرائیں، جب کے بعد امیدواروں نے ڈیرہ سٹی کو میدان جنگ بناکر املاک کو ناقابل تلافی نقصان پہنچایا۔

اسلام ٹائمز۔ ڈیرہ اسماعیل خان میں گزشتہ دو روز سے ایف سی بلوچستان کیلئے بھرتی کا عمل جاری تھا۔ ایف سی بھرتی سنٹر کے عملے کی جانب سے بھرتی کیلئے درخواستیں مقررہ تعداد سے زیادہ ہونے پر انہوں نے مزید درخواستیں لینے سے انکار کر دیا، اور کہا کہ جن کی تعلیم ایف اے ہے، وہ کاغذات جمع کرائیں۔ جس پر بنوں، لکی مروت، ٹانک اور دیگر اضلاع سے آنیوالے امیدوار بپھر گئے۔ انہوں نے بھرتی سنٹر کے عملے کیخلاف نعرے بازی شروع کر دی۔ احتجاج کا دائرہ وسیع کرتے ہوئے امیدوار جی پی او موڑ پر آگئے اور وہاں بڑے بڑے سائن بورڈز توڑ ڈالے اور بینرز پھاڑ دیئے۔ سرکلر روڈ پر لگائے گئے لاکھوں روپے مالیت کے پودے اکھاڑ ڈالے اور ان پودوں کو پانی فراہم کرنے والے واٹر پمپ بھی اپنے ساتھ لے گئے۔ کئی دکانوں کی توڑ پھوڑ کی۔ اس موقع پر روڈ بھی بلاک کیا گیا اور موجود گاڑیوں کے شیشے بھی توڑ ڈالے۔ ہجوم کے بے قابو ہونے پر پولیس کی بھاری نفری موقع پر پہنچ گئی اور آنسو گیس و ہوائی فائرنگ کے ذریعے مظاہرین کو منشتر کیا۔