اسلام ٹائمز۔ گورنر پنجاب سلمان تاثیر کو اسلام آباد میں قتل کرنیوالے ایلیٹ فورس کے اہلکار ملک محمد ممتاز حسین قادری کی پھانسی کیخلاف کراچی میں احتجاج کے باعث صبح سویرے سے ہی کاروباری زندگی معطل ہوگئی، مرکزی کاروبار مراکز بند رہے، جبکہ سڑکوں پر ٹریفک برائے نام تھی۔ بعد نماز ظہر تنظیمات اہلسنت کی اپیل پر نمائش چورنگی پر شدید احتجاج کیا گیا۔ بعد ازاں مظاہرین نے شاہراہ فیصل پر بھی احتجاج کیا، اس دوران شاہراہ فیصل اور اسکے اطراف میں شدید ٹریفک جام رہا۔ دوسری جانب جماعت اسلامی کراچی کے زیر اہتمام یونیورسٹی روڈ پر ممتاز قادری کی غائبانہ نماز جنازہ ادا کی گئی اور احتجاجی مظاہرہ کیا گیا۔