اسلام ٹائمز - ڈی آئی خان، ٹارگٹ کلنگ کیخلاف احتجاجی مارچ

اسلام ٹائمز: فرقہ ورانہ ٹارگٹ کلنگ کیخلاف ایم ڈبلیو ایم اور آئی ایس او کے زیراہتمام جامع مسجد لاٹو فقیر سے احتجاجی مارچ کا آغاز ہوا، جو کہ تھلہ بموں شاہ، حسینی چوک، شہید عارف حسینی چوک سے گزر کر سرکلر روڈ سے ہوتا ہوا فوارہ چوک پہنچ کے مظاہرے میں تبدیل ہوگیا۔

اسلام ٹائمز۔ ڈیرہ اسماعیل خان میں فرقہ ورانہ ٹارگٹ کلنگ کے خلاف جامع مسجد شیعہ لاٹو فقیر سے فوارہ چوک تک اہل تشیع نے احتجاجی مارچ کیا ہے۔ مجلس وحدت مسلمین اور امامیہ اسٹوڈنٹس کے زیراہتمام احتجاجی مارچ کا آغاز جامع مسجد شیعہ لاٹو فقیر سے ہوا، جو کہ تھلہ بموں شاہ، حسینی چوک، شہید عارف حسینی چوک، امامیہ گیٹ سے ہوتا ہوا سرکلر روڈ سے گزر کر فوارہ چوک پہ پہنچ کے احتجاجی مظاہرے میں تبدیل ہوگیا۔ احتجاجی مارچ میں مختلف تنظیموں کے علاوہ شہریوں کی بڑی تعداد نے شرکت کی۔ مجلس وحدت مسلمین کے مرکزی ڈپٹی سیکرٹری جنرل آغا احمد اقبال رضوی نے ٹارگٹ کلنگ کی شدید الفاظ میں مذمت کرتے ہوئے اسے پاکستان اور عوام کیلئے زہر قاتل قرار دیا۔ مظاہرے سے آئی ایس او کے مرکزی نائب صدر سرفراز نقوی نے بھی خطاب کیا اور انتظامیہ سے قاتلوں کی فوری گرفتاری کا مطالبہ کیا۔ مظاہرے میں خواتین کی بڑی تعداد نے بھی شرکت کی۔ ماوں کے عالمی دن کے موقع پر ڈی آئی خان کی ماوں نے صوبائی و وفاقی حکومت سے اپنے جوان بچوں کے قاتلوں کی گرفتاری اور حیات بچوں کے جانی تحفظ کا مطالبہ کیا ہے۔