اسلام ٹائمز - ڈی آئی خان احتجاجی دھرنا

اسلام ٹائمز: وہ شاہراہیں جو شیعان حیدر کرار کے بے گناہ لہو سے بار بار سرخ رہی، وہ کئی گھنٹوں تک لبیک یاحسین (ع) کے فلک شگاف نعروں سے گونجتی رہیں، ڈیرہ کی تاریخ میں پہلی مرتبہ کسی مین شاہراہ پر گھنٹوں پر محیط مجلس کا اہتمام ہوا۔

اسلام ٹائمز۔ ملک بھر کے دیگر شہروں کی طرح ڈیرہ اسماعیل خان میں بھی ایم ڈبلیو ایم کے سربراہ علامہ راجا ناصر عباس کی کال پر مرکزی سرکلر روڈ پر احتجاجی دھرنا و مجلس عزا کا اہتمام کیا گیا۔ حیدری چوک کے سامنے سرکلر روڈ کو مکمل طور پر بعد از نماز جمعہ ہر قسم کی ٹریفک کیلئے بند کردیا گیا، جبکہ چار بجے باقاعدہ طور پر احتجاج و مجلس عزا کا آغاز ہوا۔ ڈیرہ کی تاریخ میں پہلی مرتبہ ایسا ہوا ہے کہ سرکلر روڈ پر گھنٹوں پر محیط مجلس و احتجاجی دھرنے کا انعقاد کیا گیا ہو، یہ حقیقت بھی اپنی جگہ کہ جو شاہرائیں شیعان حیدر کرار کے بے گناہ لہو سے بار بار سرخ رہی، وہ کئی گھنٹوں تک لبیک یاحسین (ع) کے فلک شگاف نعروں سے گونجتی رہیں۔ دھرنے سے خطاب کرتے ہوئے ایم ڈبلیو ایم پنجاب کے مسئول علامہ اصغر عسکری نے کہا کہ اس وقت پورے پاکستان میں مکتب اہلبیت علیھم السلام کے نام لیوا سڑکوں پر ہیں اور حکومت سے مطالبہ کرتے ہیں کہ وہ فی الفور ظالموں کیخلاف کارروائی کرے۔