محرم الحرام، ڈی آئی خان امن اجلاس

اسلام ٹائمز۔ ڈیرہ اسماعیل خان میں اہل تشیع اور اہل سنت اکابرین پر مشتمل محرم الحرام امن اجلاس ضلعی انتظامیہ کے زیرسرپرستی منعقد کیا گیا ہے، جس میں صوبائی وزرا اور عوامی نمائندوں، تاجران، علماء کرام اور مذہبی جماعتوں کے رہنماوں نے شرکت کی۔ اجلاس میں پاک فوج کی طرف سے کرنل وقار، صوبائی وزیر زراعت خیبر پختونخوا سردار اکرام خان گنڈہ پور، ڈپٹی کمشنر ڈیرہ معتصم باللہ شاہ، تحصیل ناظم سردار عمر امین خان گنڈ ہ پور، ڈی پی او یاسر آفریدی، اسسٹنٹ کمشنر زاہد پرویز وڑائچ، ٹی ایم او عمر خان کنڈی، تحصیلدار پروآ و ڈیرہ شوکت اقبال و دیگر شریک تھے۔ اجلاس سے علامہ رمضان توقیر، سابق ایم پی اے عبدالحلیم قصوریہ، مرکزی انجمن تاجران کے صدر راجہ اختر علی، ایوان زراعت کے صدر حاجی عبدالرشید دھپ، تحصیل ناظم پروآ سردار امتیاز بلوچ، مولانا حماد اللہ فاروق، حاجی اللہ بخش سپل، سید تحسین علمدار شاہ، ڈاکٹر عبداللہ ظفری اور سہیل اعظمی سمیت دیگر نے خطاب کیا اور محرم الحرام کے حوالے سے اپنے مسائل اور مختلف تجاویز پیش کیں۔

اجلاس سے خطاب کرتے ہوئے کمشنر ڈیرہ نے کہا کہ ڈیرہ میں شیعہ سنی پیار محبت سے زندگی بسر کررہے ہیں۔ دشمن کی سرگرمیوں پر ہمیں ہوشیار رہنا ہے۔ آپس کے معمولی اختلافات کو بھلاکر ضلع کی ترقی کیلئے امن کے قیام کو یقینی بنانا ہے۔ اہل تشیع، اہل سنت، عمائدین علاقہ تاجران اور میڈیا محرم میں امن کیلئے اپنا کردار ادا کریں ۔2009 کے امن معاہدہ پر عمل کیا جائے گا، نیشنل ایکشن پلان کے تحت اسلحہ کی نمائش، لاؤڈ سپیکر کے استعمال وغیرہ پر پابندی ہوگی۔ پاک فوج کے کرنل وقار نے محرم الحرام کے سلسلے میں سرکٹ ہاؤس میں شیعہ سنی اکابرین کے اجلاس سے خطاب کرتے ہوئے کہا ہے کہ پاک فوج نے محرم الحرام کے پر امن انعقاد کے سلسلے میں تمام انتظامات مکمل کرلیے ہیں۔ ضلعی انتظامیہ پاک فوج سے جس قسم کی امداد طلب کرے گی پاک فوج اس پر عمل کرے گی۔ انہوں نے کہا کہ پاک فوج امن کے بہتری کیلئے کام کررہی ہیں۔ ہماری کوشش ہے کہ سول انتظامیہ کے ساتھ ملکر محرم الحرام کو پر امن اختتام پذیر کریں اور اس کیلئے تمام وسائل بروئے کار لائیں گے۔