مرکزی کنونشن پہ جشن مباہلہ کی تقریب

اسلام ٹائمز۔ آئی ایس او پاکستان کے مرکزی کنونشن کے دوسرے روز جشن مباہلہ کا انعقاد ہوا۔ جشن کی تقریب برادر احمد ناصری سمیت درجنوں نوجوانوں نے منقبت خوانی کی۔ جشن کی تقریب سے خطاب میں علامہ مرزا حسین صابری نے 24 ذوالحجہ، یوم مباہلہ کے موقع پر مبارکباد دیتے ہوئے کہا کہ یوم مباہلہ حق و باطل کی پہچان کا دن ہے، عید مباہلہ کے دن نبی اکرم ۖ نے اہل بیت علیہم السلام کے ہمراہ مباہلہ کیلئے آنے والے نصرانیوں کو شکست دیکر اسلام کی سربلندی میں اضافہ کیا۔ انہوں نے کہا کہ مباہلہ کے لئے رسول اکرم ۖ، حضرت علیؑ، بی بی فاطمہ ع، حضرت امام حسین علیہ السلام اور حضرت امام حسن ع کے سامنے نصرانیوں کے علماء نے ہار مانتے ہوئے دنیا کو رسول ۖ اور انکی اہل بیت علیہ السلام کی شان بتلا دی۔ انہوں نے کہا کہ مباہلہ تاریخ اسلام کا سنہرا واقعہ ہے، جس میں رسول کریم صلی اللہ علیہ و آلہ وسلم نے اپنے اہل بیت علیہ السلام کے ہمراہ بغیر کسی جنگ کے نصرانیوں کو شکست دی۔ انکا کہنا تھا کہ آج بھی معاشرہ اگر رسول خدا صلی اللہ علیہ و آلہ وسلم اور اہلبیت ع کی تعلیمات پر عمل پیرا ہو جائے تو معاشرتی بے راہ روی، دین سے دوری اور قتل و غارت سمیت دیگر برائیاں ختم ہو سکتی ہیں۔ آئی ایس او کے مرکزی صدر سید سرفراز نقوی نے جشن کی محفل سے خطاب کرتے ہوئے کہا کہ اہلبیتِؑ رسول ص کی زندگی ہمارے لئے مشعل راہ ہے، لیکن افسوس کہ اہل بیت علہیم السلام کی تعظیم اس وقت کے نصرانیوں نے تو کی، لیکن آج کے مسلمان اکی تعلیمات پر عمل سے منہ موڑ رہے ہیں۔ انہوں نے کہا کہ پاکستان سمیت دنیا بھر میں رسول خدا صلی اللہ علیہ و آلہ وسلم اور اہلبیت علیہ السلام کی سیرت پر عمل پیرا ہو کر امن و اتحاد کا پیغام پھیلا جا سکتا ہے، جیسے خانوادہ رسول صلی اللہ علیہ و آلہ وسلم نے اپنے کردار و اخلاق کی بدولت نصرانیوں کو حق تسلیم کرنے پر مجبور کر دیا۔