کراچی، یوم عاشور کا جلوس

اسلام ٹائمز۔ پاکستان بھر میں حضرت امام حسین علیہ السلام اور شہدائے کربلا کی عظیم قربانیوں کی یاد میں یوم عاشور مذہبی عقیدت و احترام کے ساتھ منایا گیا جبکہ کراچی سمیت ملک کے دیگر شہریوں میں نکالے جانے والے ماتمی جلوسوں میں سے بیشتر اپنے مقررہ راستوں سے ہوتے ہوئے اختتام پذیر ہوگئے۔ کراچی میں یوم عاشور کا مرکزی جلوس نشتر پارک سے برآمد ہوا اپنے مقررہ راستوں سے ہوتا ہوا حسینہ ایرانیاں کھارادر پر اختتام پذیر ہوا، جہاں پر ماتمی دستے نوحہ خوانی و سینہ زنی میں مصروف رہے۔ تفصیلات کے مطابق یوم عاشور کی مرکزی مجلس عزا نشتر پارک میں منعقد ہوئی جس میں علامہ شہنشاہ نقوی نے مصائب عاشورا بیان کئے۔ مجلس کے اختتام پر مرکزی جلوس نشتر پارک سے برآمد ہوا جو کہ اپنے مقررہ راستوں سے ہوتا ہوا امام بارگاہ حسینیہ ایرانیان کھارادر پہنچ کر اختتام پزیر ہوا۔ مرکزی جلوس عزاء میں علم، تابوت، تعزیئے، شبیہ ذوالجناح بھی برآمد کئے گئے۔ مرکزی جلوس میں خواتین، بچوں، بوڑھوں سمیت لاکھوں کی تعداد میں عزاداران امام مظلومؑ شریک تھے، مرکزی جلوس کے موقع پر سیکیورٹی کے سخت انتظامات کئے گئے ہیں۔ جلوس کی گزر گاہوں میں منتظمین کی جانب سے پانی اور دودھ کی سبیلیں لگائی گئیں۔ جلوس کے راستوں پر 10 ہزار پولیس اہلکار جبکہ 5 ہزار رینجرز اہلکاروں نے سیکیورٹی کے فرائض انجام دیئے جبکہ جلوس کی نگرانی کے لئے پولیس کی جانب سے کمانڈ اینڈ کنٹرول سسٹم بھی قائم کیا گیا جس میں خفیہ کیمروں کے ذریعے جلوس کی نگرانی کی گئی۔ اس کے علاوہ جلوس کی سیکیورٹی کو یقینی بنانے اور کسی بھی قسم کے ناخوشگوار واقعے سے بچنے کے لیے جلوس کی فضائی نگرانی بھی کی گئی اور پاک فوج کے دستے بھی پولیس اور رینجرز کی معاونت کیلئے اسٹینڈ بائی پوزیشن پر رہے۔